Tendenca në rritje e kriminalitetit në vend, ka qenë thelbi i deklaratës së sotme të Partisë Lëvizja e Legalitetit, e cila përmes faqes zyrtare të këtij subjekti, ka artikuluar nevojën e hartimit të një kodi penal me nivel më të lartë ndëshkueshmërie, të përafruar me standardet e disa prej vendeve euro-atlantike.
Në qëndrimin deklarativ të PLL-së, nënvizohet domosdoshmëria e forcimit të shtetit ligjor, si dhe krijimi i mekanizmave të besueshëm që do të siguronin rendin dhe qetësinë e duhur për qytetarët shqiptarë.
Sipas legalistëve, krijimi i xhandarmërisë shtetërore, si dhe një kuadër ligjor që implementohet me kurajo dhe me qasjen vullnetplotë të shtetbërësve, janë ato që duhen dhe kërkojnë qytetarët.
Ja deklarata e plotë:
Rendi përpara një kaosi total. Shteti i pa aftë për të siguruar qetësi tek shtetasit e vet.
Ajo që PLL, kërkon dhe e ka një ndër kërkesat e saj programore.
Kërkohet rend dhe qetësi, me vullnet dhe kurajo kjo arrihet, krimi është shumë i vogël përpara një shteti ligjor.
Rendi, qetësia personale dhe familjare për shqiptarët janë minimalja e domosdoshme në një shtet që e meriton dhe kërkon antarësim në BE.
Pengëmarrjet, tritoli, droga, trafiku njerëzor, vrasjet me paramendim dhe të porositura (si këto të kohëve të fundit) duhet të marrin fund dhe të ndëshkohen njëherë dhe përgjithmonë.
Xhandarmaria shtetërore, një kod penal më ndëshkues ndaj krimit, pse jo ndoshta të njejtë me atë të disa shteteve (Euro-Atlantike) me demokraci më të zhvilluara se e jona, janë ato që duhen dhe besojmë kërkojnë qytetarët për të patur më shumë rend dhe qetësi shpirterore.
