Në Ditën Europiane të Përkujtimit të Viktimave të Regjimeve Totalitare, Adnan Ramadani ka sjellë një kujtim të veçantë për xhaxhain e babait të tij, Qazim Ramadanin, një figurë që familja e kujton si burrë trim, atdhetar dhe zogist të përkushtuar.
Në rrëfimin e tij, Adnani e përshkruan Qazim Ramadanin si një “inteligjent të dorës së parë”, i cili e pagoi shtrenjtë përkatësinë dhe bindjet e tij politike.
Qazim Ramadani u burgos dhe internua nga pushtuesit fashistë italianë, ndërsa pas ardhjes së regjimit komunist shqiptar u përball sërish me burgun dhe përndjekjen politike.
Një jetë mes dy regjimeve, dy përndjekjeve dhe një qëndrese që sot mbetet pjesë e kujtesës familjare.
Pikërisht në këtë ditë përkujtimi, Adnan Ramadani rikthen në vëmendje historinë e xhaxhait të babait të tij, duke e përshkruar si një njeri që, pavarësisht vuajtjeve, mbeti besnik ndaj bindjeve dhe atdhedashurisë.
“Qofsh në kujdes të Allahut, axha Qazim!” – shkruan Adnan Ramadani në homazhin e tij për një familjar që nuk u harrua dhe që, përmes kujtesës së brezave, vazhdon të jetojë në historinë e familjes.
