Një qytetar që priti për rreth pesë orë në Pogradec për të takuar kryeministrin Edi Rama, me qëllim që ta falënderonte për zgjidhjen e një problemi, është bërë objekt reagimi nga kreu i Lëvizjes së Legalitetit, Shpëtim Axhami.
Në një postim në rrjetet sociale, Axhami e interpreton rastin si një shembull të mënyrës se si, sipas tij, një e drejtë që duhet të garantohet nga institucionet shtetërore mund të perceptohet nga qytetarët si një “nder” i bërë nga pushteti.
“E priti pesë orë për të takuar…?! E dinte xhaxhua se do të flitej për ‘Pasqyrën Albania’ dhe donte ta falënderonte… Nuk kishte gjetur derman askund… Ndërsa nga dje, papritur, i qetë. Gjithçka ‘OK’”, shkruan Axhami.
Ai e lidh këtë situatë me atë që e konsideron si një klimë autoritarizmi, duke akuzuar pushtetin për përdorim të propagandës dhe mesazheve që synojnë, sipas tij, të krijojnë perceptimin se “çdo gjë është në rregull”.
Axhami ironizon gjithashtu mënyrën se si paraqiten marrëdhëniet mes qytetarit dhe pushtetit, duke shkruar: “Ujë në burim i kthjellët, turbullohet rrugës”.
Në fund, kreu i PLL-së e përmbledh mesazhin e tij me një deklaratë të drejtpërdrejtë: “E drejta nuk është nder. Është detyrim.”
Reagimi vjen një ditë pasi u bë publik rasti i qytetarit nga Pogradeci, i cili qëndroi për orë të tëra në pritje për të takuar kryeministrin, duke deklaruar se dëshironte ta falënderonte personalisht pasi një çështje e tij ishte zgjidhur.
