Shpëtim Axhami, ka bërë thirrje për një kthesë të fortë politike në vend, duke deklaruar se qeverisja aktuale ka humbur besimin dhe se shteti nuk mund të vijojë të mbahet peng i interesave politike.
Në një reagim të fortë, Axhami ngre shqetësimin për situatën politike, institucionale dhe ekonomike në Shqipëri, duke vënë theksin te varfëria, shpopullimi, korrupsioni dhe mungesa e besimit të qytetarëve te institucionet.
“Kjo qeverisje ka rënë. Shteti nuk mund të mbahet peng i pushtetit politik”, shprehet Axhami, duke e cilësuar situatën si një krizë që, sipas tij, nuk lidhet më vetëm me individë të veçantë, por me vetë funksionimin e shtetit.
Sipas kreut të PLL-së, Shqipëria nuk mund të vazhdojë të qeveriset përmes klientelizmit, korrupsionit dhe kapjes së institucioneve. Ai kërkon rikthimin e institucioneve në shërbim të ligjit, qytetarit dhe interesit kombëtar.
Axhami e sheh shtatorin si një moment vendimtar, duke bërë thirrje për intensifikimin e protestës qytetare dhe politike, ndërsa u drejtohet edhe forcave opozitare që të lënë mënjanë interesat personale dhe ndarjet partiake.
“Sot më tepër se kurrë nevojitet bashkimi i çdo faktori opozitar”, thekson ai, duke kërkuar një platformë të qartë politike dhe një alternativë konkrete për shqiptarët.
PLL propozon si hap të parë dorëheqjen e qeverisë Rama dhe krijimin e kushteve për zgjedhje të lira, të ndershme dhe të besueshme përmes një qeverie teknike me mandat të përcaktuar.
Një tjetër pikë e rëndësishme e platformës së propozuar nga Axhami është ndryshimi i Kodit Zgjedhor, me synimin për një sistem që, sipas tij, të garantojë përfaqësim real të vullnetit të qytetarëve.
Mesazhi i kreut të PLL-së shkon përtej kërkesës për një rotacion të thjeshtë politik. Ai kërkon ndryshim të mënyrës së qeverisjes dhe një shtet që funksionon mbi ligjin, meritën, përgjegjshmërinë dhe transparencën.
“Shqipëria nuk ka nevojë vetëm për një rotacion formal pushteti. Ka nevojë për një ndryshim të mënyrës se si duhet të qeveriset vendi dhe si bëhet shteti. Koha për ndryshim ka ardhur!”, përfundon Axhami.
