Kreu i Partisë Lëvizja e Legalitetit, Shpëtim Axhami, ka vlerësuar si një hap të guximshëm dhe të domosdoshëm nismën e ndërmarrë në Hungari për hapjen e arkivave të policisë sekrete, duke e cilësuar atë si një model në shërbim të së vërtetës dhe forcimit të demokracisë.
Në një reagim publik, Axhami thekson se Shqipëria nuk duhet të mbetet pas në këtë proces të rëndësishëm historik dhe institucional. Sipas tij, hapja e plotë e dosjeve të ish-Sigurimit dhe ndëshkimi i krimeve të komunizmit përbëjnë një domosdoshmëri të vonuar, por të pashmangshme për vendin.
Ai nënvizon se e drejta e qytetarëve për të njohur të vërtetën, drejtësia për viktimat dhe transparenca janë shtylla themelore për ndërtimin e një shoqërie demokratike funksionale, si dhe kontribuojnë drejtpërdrejt në forcimin e orientimit euroatlantik të Shqipërisë.
Më tej, kreu i Lëvizjes së Legalitetit bën thirrje për ndërmarrjen e hapave konkretë ligjorë për hapjen e arkivave pa kufizime dhe pa ndikime politike, duke kërkuar fundin e pandëshkueshmërisë për krimet e së kaluarës. Sipas tij, shembulli i Hungarisë dëshmon se përballja me historinë nuk është dobësi, por një forcë që çon drejt një të ardhmeje më të drejtë dhe më të qëndrueshme për shoqërinë.
