Kreu i Lëvizjes së Legalitetit, Shpëtim Axhami, ka përkujtuar sot poetin antikomunist dhe martirin e lirisë, Havzi Nelën, i cili u ekzekutua me varje më 10 gusht 1988 në Kukës.
Në një publikim në rrjetet sociale, Axhami e cilëson Nelën si “tmerrin e diktaturës” dhe një simbol të qëndresës ndaj regjimit komunist. Ai propozon që 10 gushti të kujtohet si “Dita e Poetëve në Shqipëri”, në nderim të figurës dhe sakrificës së poetit kuksian.
Axhami rikujton se Havzi Nela e ktheu poezinë në një formë qëndrese ndaj diktaturës, ndërsa jeta e tij u shndërrua në një kalvar burgjesh, internimesh dhe persekutimi politik.
Nela lindi më 20 shkurt 1934 në Kollovoz të Kukësit. Në vitin 1967, së bashku me bashkëshorten e tij, tentoi të arratisej drejt Jugosllavisë, por u kthye në Shqipëri dhe u arrestua. Ai u dënua fillimisht me 15 vite burg dhe më pas me një tjetër dënim, duke kaluar në total 21 vite në burgjet politike të diktaturës.
Pas lirimit, përndjekja ndaj tij vazhdoi. Në vitin 1987 u arrestua dhe u internua sërish, ndërsa në vitin 1988 u dënua me vdekje.
Më 10 gusht 1988, Havzi Nela u ekzekutua me varje në qendër të Kukësit. Sipas Axhamit, edhe pas ekzekutimit, regjimi vijoi ta poshtëronte, duke mos i dhënë familjes mundësinë për t’i prehur eshtrat në një varr dinjitoz.
Eshtrat e tij u gjetën vetëm më 20 gusht 1993, pranë fshatit Kolsh, rreth dy kilometra larg Kukësit.
Në mesazhin e tij, Shpëtim Axhami e cilëson Havzi Nelën si një figurë që “nuk u përkul” përballë diktaturës dhe që mbeti simbol i qëndresës, dinjitetit dhe lirisë.
Në përfundim, kreu i PLL-së kërkon që sakrifica e Nelës të shërbejë si kujtesë edhe për mijëra shqiptarët e tjerë që u burgosën, internuan apo u vranë gjatë regjimit komunist.
“Qoftë i qetë në parajsë poeti antikomunist dhe martiri i lirisë, Havzi Nela!”, shkruan Axhami.
