Kreu i Lëvizjes së Legalitetit, Shpëtim Axhami, ka reaguar për mungesën e përkujtimit publik të poetit dhe disidentit antikomunist Havzi Nela në 38-vjetorin e ekzekutimit të tij.
Në një postim në rrjetet sociale, Axhami thekson se Nela, i cili u var nga regjimi komunist më 10 gusht 1988, ishte bir i Kollovozit të Lumës dhe një figurë që, sipas tij, duhet të jetë burim krenarie për çdo shqiptar dhe veçanërisht për kuksianët.
Axhami ngre pikëpyetje mbi faktin që, sipas tij, në këtë përvjetor nuk pati reagime apo përkujtim nga përfaqësues vendorë apo figura politike me origjinë nga Kukësi që sot lidhen me Partinë Socialiste. Ai e cilëson këtë heshtje si të pakuptimtë dhe shprehet se “arsyet dihen”, duke e mbyllur reagimin me një akuzë të drejtpërdrejtë: “Turpi mbetet për ta”.
Më poshtë, postimi i plotë i kreut të PLL-së, Shpëtim Axhami:
“Edhe kjo tregon origjinën politike të tyre!
Poeti Havzi Nela i jep kurajo e krenari çdo shqiptari për mënyrën si Ai e përballoi, me dinjitet dhe në kundërshtim të hapur, diktaturën komuniste.
Por Havzi Nela, bën veçanërisht krenarë kuksianët, pasi ishte bir i Kollovozit të Lumës, Kukës.
Atëherë lind pyetja, si ka mundësi që në 38-vjetorin e varjes së tij nga regjimi diktatorial enverist i PPSH-së, me 10 Gusht 1988, bashkia Kukës, prefektura apo qarku Kukës, asnjë deputet, ministër, zëvendësministër, kryetar bashkie apo intelektual me origjinë nga Kukësi, lindur apo rritur në Kukës, që sot lidhet me Partinë Socialiste ose janë zgjedhur prej saj, të mos shprehte asnjë përkujtim apo nderim për të?
Heshtja e tyre është e kuptueshme dhe arsyet dihen…Turpi mbetet për ta!
Havzi Nela vërtetë i kalon përmasat e Kukësit dhe është nder e duhet të përkujtohet nga të gjithë shqiptarët, por nderimi prej atyre që kanë lidhje me Kukësin është një detyrim moral.
Kreu Legalist, Shpëtim Axhami”
