Çifti politik Monika Kryemadhi-Ilir Meta, njëkohësisht bashkëudhëtarë jete prej 28 vitesh i kanë dhënë fund martesës së tyre këtë të premte, duke firmosur divorcin.
Në senacën në Gjykatën Civile të Tiranës ishte i pranishëm edhe kreu i Partisë së Lirisë, Ilir Meta, i cili ndodhet në burg që prej tetorit 2024, në kuadër të hetimeve të SPAK.
Meta është shoqëruar nga qelia në burgun 313 drejt Dhomës Civile nga Policia e Burgjeve, siç shihet në pamjet e siguruara nga Syri. Ndërkohë, Monika Kryemadhi nuk është paraqitur, duke lejuar avokatin e saj mbrojtës, Redi Llanaj ta përfaqësojë në seancën e ndarjes.
Lajmi është konfirmuar nga Gjykata e Tiranës, në një njoftim zyrtar të shpërndarë për mediat.
“Nisur nga interesi i medias, ju bëj me dije si më poshtë: Sot në datën 11.04.2025, ora 10:30, pranë Gjykatës së Shkallës së Parë të Juridiksionit të Përgjithshëm Tiranë, Dhoma Civile, u zhvillua seanca e pajtimit si dhe seanca gjyqësore me objekt zgjidhje martese me paditës I.M dhe të paditur M.K, ku të pranishëm ishin paditësi dhe avokati i tij. Pala e paditur, e njoftuar nga gjykata me fletëthirje, nuk u paraqit në seancë, pa asnjë shkak ligjor, duke e lënë gjykimin në mungesë.
Në përfundim të seancës, gjykata vendosi : Zgjidhjen e marteses midis paditesit I.M dhe te paditures M.K”, njoftoi Gjykata e Tiranës.
