Kryetari i Lëvizjes së Legalitetit, Shpëtim Axhami, ka rikthyer në vëmendjen publike një prej problematikave më të mëdha me të cilat përballet Shqipëria: krizën demografike dhe largimin e vazhdueshëm të popullsisë.
Në një reagim të publikuar në rrjetet sociale, Axhami paralajmëron se tkurrja e popullsisë dhe shpopullimi nuk janë më thjesht një shqetësim statistikor, por një sfidë që mund të përcaktojë të ardhmen e vendit.
Duke iu referuar projeksioneve të Kombeve të Bashkuara, kreu i PLL ngre alarmin se popullsia e Shqipërisë mund të zbresë në rreth 1.18 milionë banorë deri në vitin 2100, nëse tendencat aktuale demografike vijojnë.
Sipas Axhamit, emigrimi i të rinjve dhe njerëzve në moshë pune është një prej faktorëve kryesorë që ushqen këtë krizë, pasi largohen pikërisht brezat që do të krijonin familje dhe do të sillnin gjeneratat e reja.
Në qëndrimin e tij, kreu i PLL e lidh drejtpërdrejt krizën demografike edhe me kushtet ekonomike dhe sociale në vend, duke renditur ndër faktorët pagat, punësimin, strehimin, koston e jetesës, arsimin, shëndetësinë dhe sigurinë ekonomike.
“Shqipëria po tkurret, kjo krizë demografike nuk mund të injorohet”, është mesazhi i Axhamit, i cili kërkon një strategji kombëtare afatgjatë për përballimin e situatës.
Ai propozon politika më të forta për familjet e reja, strehim më të përballueshëm, vende pune cilësore, paga konkurruese dhe shërbime publike më të mira, me synimin që emigrimi të mos shihet nga të rinjtë si e vetmja alternativë për një jetë më të mirë.
Me këtë reagim, Shpëtim Axhami vijon të shfaqet si një zë publik që përpiqet të vendosë në qendër të debatit çështje që lidhen me të ardhmen afatgjatë të Shqipërisë, duke e zhvendosur vëmendjen përtej debatit të përditshëm politik dhe drejt problematikave strategjike si demografia, familja, emigrimi dhe e ardhmja e brezave të rinj.
“Kriza demografike kërkon një strategji kombëtare afatgjatë”, thekson Axhami, duke paralajmëruar se, nëse nuk ndryshojnë kushtet që i shtyjnë shqiptarët të largohen dhe familjet të mos kenë fëmijë, shpopullimi mund të kthehet në një prej sfidave më të mëdha të vendit.
Postimi i plotë:
Shqipëria po tkurret, kjo krizë demografike nuk mund të injorohet
Shqipëria po përballet me një nga sfidat më të mëdha të sotme dhe dekadave të ardhshme, tkurrjen e popullsisë dhe shpopullimin e vendit.
Sipas projeksioneve të Kombeve të Bashkuara, popullsia e Shqipërisë mund të zbresë në rreth 1.18 milionë banorë në vitin 2100. Kjo shifër nuk është një sinjal alarmi për atë që mund të ndodhë nëse tendencat demografike nuk ndryshojnë.
Shqipëria ka kaluar nga një shoqëri me lindshmëri të lartë në një shoqëri ku familjet kanë gjithnjë e më pak fëmijë.
Prej vitesh fertiliteti ka qenë nën nivelin e zëvendësimit.
Një prej shkaqeve kryesore të këtij fenomeni të rrëzikshëm mbetet sepse një pjesë e madhe e të rinjve, çifteve dhe njerëzve në moshë pune largohen nga vendi.
Kjo nuk do të thotë vetëm humbje e banorëve sot, por do të thotë edhe më pak lindje nesër, sepse largohen pikërisht brezat që do të krijonin familje.
Shkak i kësaj situate aktuale mbetet keq qeverisja e cila ka përgjegjësi të drejtpërdrejtë për kushtet që krijon në vend, pagat, punësimin, strehimin, koston e jetesës, shërbimet publike, arsimin, shëndetësinë, sigurinë ekonomike dhe mundësinë e të rinjve për të ndërtuar një jetë dinjitoze në Shqipëri.
Kriza demografike kërkon një strategji kombëtare afatgjatë, politika reale për familjet e reja, strehim më të përballueshëm, punësim cilësor, paga konkurruese, shërbime publike më të mira dhe mbi të gjitha krijimin e një Shqipërie ku një i ri të mos e shohë emigrimin si të vetmen rrugë për një jetë më të mirë.
Nëse nuk ndryshojmë kushtet që i shtyjnë njerëzit të largohen dhe familjet të mos lindin fëmijë, shpopullimi do të jetë një nga sfidat më të mëdha të së ardhmes së vendit.
