Kreu i Partisë së Legalitetit, Shpëtim Axhami, ka reaguar për ngërçin politik në Kosovë, duke bërë thirrje për tejkalimin e përplasjeve partiake dhe zgjidhjen sa më shpejt të krizës institucionale.
Në një postim të tij, Axhami thekson se interesi i Kosovës është shumë më i madh se emri i një presidenti, duke kërkuar që politika kosovare të gjejë një zgjidhje konsensuale për zgjedhjen e kreut të shtetit dhe konstituimin e plotë të institucioneve paszgjedhore.
Ai e lidh situatën aktuale edhe me përgjegjësinë historike që, sipas tij, mbart shteti i Kosovës, duke kujtuar kontributin e shqiptarëve ndër shekuj për lirinë dhe pavarësinë e vendit, si dhe përballjen me politikat serbe dhe përpjekjet për spastrim etnik.
Axhami nënvizon se forcimi i institucioneve të Kosovës është një përgjegjësi e madhe dhe se, në këtë kuadër, aspirata për bashkim kombëtar mbetet e rëndësishme për shqiptarët.
Sipas tij, çdo zgjatje e ngërçit politik dëmton imazhin, stabilitetin dhe interesin e Kosovës, por edhe interesat e shqiptarëve në Kosovë dhe më gjerë.
Në fund, kreu i PLL-së apelon që në këtë moment interesi i shtetit dhe i qytetarëve të Kosovës të vendoset mbi çdo interes partiak, duke kërkuar përgjegjshmëri dhe konsensus politik.
Postimi i plotë i Shpëtim Axhamit:
“Interesi i Kosovës është shumë herë më i madh se emri i një presidenti dhe gjetja e rrugës për zgjidhjen e një ngërçi politik për konstituimin institucional pas zgjedhjeve të 7 qershorit.
Për lirinë dhe pavarësinë e Kosovës kanë kontribuar shumë shqiptarë dhe faktorë të tjerë ndër shekuj…
Prandaj, përgjegjësia për krijimin dhe forcimin e institucioneve të Kosovës është e madhe. Në këtë kuadër, integrimi i saj drejt bashkimit kombëtar mbetet një aspiratë e rëndësishme për shqiptarët.
Sot, politika e Kosovës duhet të lërë mënjanë pakënaqësitë dhe debatet politike dhe të gjejë, në mënyrë konsensuale, zgjidhjen për zgjedhjen e kryetarit të shtetit…
Çdo vonesë apo vazhdim i këtij ngërçi vetëm sa dëmton imazhin, stabilitetin dhe interesin e Kosovës…
Në këto momente, mbi çdo interes partiak duhet të vendoset interesi i shtetit dhe i qytetarëve të Kosovës e i mbarë kombit tonë 🇦🇱”
