Nga Enrik Braho
Ngjarje interesante janë duke u zhvilluar në politikën shqiptare, në të dyja krahët e Morinës. Por, ndërkohë që shqiptarët e Shqipërisë janë duke kërkuar prej më shumë se një viti zgjedhje të parakohshme dhe nuk i gjejnë, ata të Dardanisë janë duke shkuar drejt zgjedhjeve të treta qëndrore brenda një periudhe shumë të shkurtër kohore.
Pas zgjedhjeve të 6 tetorit entuziazmi ishte shumë i madh jo vetëm te qytetarët e Kosovës por dhe te ata të Shqipërisë, të cilët mendonin se kishin gjetur doktorin e duhur për të shëruar plagët në të dyja krahët e shqiponjës. Por, po aq i madh sa ishte entuziazmi në ditët e tetorit, po aq i madh është dhe zhgënjimi këto ditë te ata të entuziazmuarit. Albin Kurti i vetëshpalluri parakohe kryeministër i Kosovës (pa bërë koalicionin qeveritar) nuk e ka marrë ende këtë post.
Dakordësimi nuk ka ardhur ende nga partitë fituese (VV-LDK), dhe duket se ky ngërç që s’po i japin dot zgjidhje po e çon Kosovën drejt zgjedhjeve të reja.
Por çfarë bënë pas 6 tetorit dy kandidatët Albin Kurti dhe Vjosa Osmani?
Kreu i VV-së edhe pse kishte fituar vetëm me një deputet më shumë u kap nga entuziazmi i tepërt dhe u vetëshpall kryeministër i Kososvës ende pa bërë koalicionin qeveritar. Albin Kurti e gjeje 24 orë në drejtëkëndëshin me ngjyra mjafton të lëvizje telekomandën. Albini ende pa u ulur në karrigen zyrtare të KM, në karriget e studiove televizive filloi të uleshe si një i tillë. Vizitoi studiot e të gjitha emisioneve politike, jo vetëm në Kosovë por edhe në Shqipëri.
Ndryshe bëri “kundërshtarja” e tij në këto zgjedhje, kandidatja për kryeministre e LDK-së, Vjosa Osmani. Ajo nuk ishte aspak në fokusin mediatik edhe pse ishte surpriza e vërtetë e zgjedhjeve të 6 tetorit në Kosovë. Ajo vendosi të fluturojë drejt Shteteve të Bashkuara të Amerikës, aleati kryesor i Kosovës, ku zhvilloi shtatë takime të rëndësishme me zyrtarë amerikanë, të cilat i bëri të ditura në rrjetet sociale. Ndoshta mund të ketë patur edhe takime të tjera, të cilat nuk ka dashur t’i bëjë publike. Ndërkohë Albin Kurti i VV-së, në axhendën e tij kishte takim me kryeministrin e Shqipërisë Edi Rama, ndoshta për të ai ishte më i rëndësishmi.
Zgjedhjet e 6 tetorit nxorrën në pah vetitë e Albin Kurtit
Pangopja me pushtet. Edhe pse ishte pothuajse 50 me 50 me LDK-në, ku diferencën e bënte vetëm një deputet, Albin Kurti do donte që t’i drejtonte të gjitha vetë, nëse do ta lejonin. Ai nuk lëshoi aspak për të formuar koalicion qeverisës dhe t’iu jepnin zgjidhje problemeve të Kosovës. Ai kërkon edhe ministrinë e Punëve të Brendshme edhe atë të Punëve të Jashtme nëse LDK merr postin e Presidentit.
Pabesitë e Kurtit. Prej 80 ditësh VV dhe LDK po negocionin për të formuar një koalicion qeverisës, por këto negociata patën një ngërç që nuk i jepnin dot zgjidhje të dyja palët. Por Kurti “vrapoi” i pari për të thënë se dy fituesit kryesor nuk kishin rënë dakord për të formuar koalicionin qeverisës. Përmes një video, ai i drejtoi gishtin LDK-së si fajtor të mosdakordësimi edhe pse vetë nuk lëshoi aspak. Një sjellje jo e hijshme e tij ndaj “aleatëve” të LDK-së. Ndoshta e pa si një strategji për të përfituar më shumë në zgjedhjet e ardhshme.
Por të mosmjaftonte kaq, një tjetër pabesi do të vinte dy ditë më pas. Në konstituimin e Kuvendit të Kosovës për legjislaturën e 7-të, Lëvizja Vetëvendosje propozoi Glauk Konjufcën si kryetar të Kuvendit, për të cilën asnjë prej anëtarëve të Lidhjes Demokratike të Kosovës nuk ishin në dijeni. Kjo gjë i dha përfundimisht fund negociatave për një koalicioni qeverisës mes LDK-së dhe VV-së.
Por këto pabesi të Kurtit mund të jenë si një “këmbanë alarmi” për të gjithë ata që e besuan më 6 teor, pasi pabesia ndaj LDK-së mund të jetë pabesi për ta një ditë për të gjitha premtimet që ka dhënë.
Shumë enigma mbeten për këtë fillim 2020. E vetmja gjë që dihet është se Albin Kurti nuk është kryeministri i Kosovës dhe se te simpatizantët e tij ekziston një zhgënjim, pavarësisht mospranimit nga ana e tyre.
Kënaqësia që përjetoi Albin Kurti pas 6 tetorit si një KM i vetëshpallur (pa bërë koalicionin qeveritar) ishte njëlloj si eksitimi pas një masturbimi artificial.
