Nga Elona CASLLI
Sot është e e diel. Në ekranin e madh të televizorit shfaqet Ardit Gjebrea.
Nga fjalimi kuptoj se Ardit ka ndërmend të ndihmojë 50 familje.
Shoh Arditin që para kamerave merr në telefon nënkryetaren e bashkisë, zonjën Ruseti.
Në bisedën telefonike, Arditi i thotë se ka gjetur mundësinë për të ndihmuar 50 familje, por për përzgjedhjen e familjeve nevojitet ndihma e bashkisë.
Shoh Arditin, që ngjit shkallët e bashkisë dhe kameran që e ndjek. Takon nënkryetaren Ruseti.
Ajo është krejt e qeshur dhe e fton të ulet në karrigen përballë.
Përzgjedhja e 50 familjeve që duhet të ndihmohen bëhet përballë kamerave.
Zonja Roseti ka dy kopje të regjistrit ku janë shënuar të varfrit dhe historiku i tyre. Ajo,me urtinë e një mësueseje të mirë, i dorëzon regjistrin e të varfërve Arditit dhe i shpjegon se në regjistër ekzistojnë dy kategori të njerëzve në nevojë;
1. Atyre që duhet t’ua lexojë emrat dhe adresën dhe të rrëfejë historinë e tyre.
Shembull- Silva tek rruga ” Don Bosco” është me dy fëmijë. Ajo jeton veçse me pensionin e mamasë, pasi i shoqi i ka vdekur dhe vetë është e papunë.
2. Atyre që nuk duhet t’ua lexojë emrat, por vetëm të rrëfejë historinë, pasi këto raste janë rastet e dhunës në familje.
Shembull- Burri është në burg pasi e dhunonte sistematkisht dhe ajo jeton veçse me fëmijët.
Leximi i dy kategorive bëhet rrjedhshëm nga Gjebrea.
Ruseti, ndërhyn herë pas here, për të shfaqur punën e madhe që bën bashkia e Tiranës nga rasti në rast.
Pasi përfundohet apeli i të varfërve para kameras, Gjebrea përshëndetet me Rusetin dhe në ekran shfaqet një djalë, i cili tregon përmbajtjen që ka çdo pako, që do t’i dorëzohet familjeve në nevojë.
Ekrani përplas në veshët e mi fjalë si:
Gjizë, vaj, sheqer, oriz.
Djali e shoqëron çdo përbërës të pakos me kilogramët përkatës.
Pastaj kamera zhvendoset drejt supermarketit ku një vajzë mbush karrocën, për të bërë gati pakon.
Pastaj sheh makinat që mbushen dhe dorezohen pakot që dorëzohen në dyer të ndryshme.
Këtë herë, fytyra e të varfërve nuk shfaqet. Ndoshta ka mjaftuar leximi me zë të lartë nga ana e Arditit dhe komenti i gjatë i zonjës Ruseti.
Post Scriptum- Pyes veten në kjo është e diela shqiptare apo antishqiptare.
