Nga Enea Hoxha
Viti 2019, në shfletimin e parafundit të kalendarit, prodhoi një ngjarje që do mbetet gjatë në memorien e brezave, duke sjellë një tragjedi me përmasa të dhimbshme, duke mos kursyer jetët e 51 qytetarëve shqiptarë, të cilët përpos halleve të përditshmërisë, të ndihmuar dhe nga dora mizore dhe babëzia e politikave të ndjekuara gjenden të ekspozuar përballë rreziqeve të natyrës.
Më 26 nëntor, një tërmet i fuqishëm shkundi Shqipërinë, ku përpos humbjeve të jetëve njerëzore, shembi themelet e një qeverie karakatinë që vazhdon të mbahet në këmbë nga propaganda e shfrenuar dhe deliri i një kryeministri, që u servir shqiptarëve paranojën e tij duke i zhytur akoma më shumë në mjerim dhe pashpresshmëri.
Shqipëria e aspiratës europiane, gjatë këtij viti dëshmoi se sa larg ëndrrës europiane është. Shqiptarët nuk duan propagandë, nuk duan show-n e kryeministrit që orë e cast shfaqet në mediat e uzurpuara, nuk duan boshibozukët e pushtetit, të cilët të majmur në afera korruptive kridhen në luksin e ndërtuar me paratë e taksa-paguesve, por duan në realitet që u jep shpresë, u jep siguri për të ardhmen e tyre, u jep besim në vlerat dhe identitetin e tyre kombëtar.
Zbrazja e vendit nga largimi masiv i shqiptarëve, nga ikja e të rinjve, të cilët largohen ballngrysur, zemërthyer, pasi atdheu i tyre nuk ofron asnjë shenjë perpsektive apo ardhmërie, përbën një nga momentet kulminante të situatës në të cilën ndodhet vendi.
Në bashkëbisedimet e mia të clirta, me bashkëmoshatarët e mi, vërej se ka shumë pesimizëm, dëshpërimi mbizotëron në cdo llafosje që bëjmë, e ardhmja është e mjegullt, pasi asnjëri dhe askush nuk guxon të thotë se c’mund të bëjë, si mund të ndërtojë jetën e tij.
Të gjitha këto, janë produkt i një keqqeverisje, e cila nuk mendon për rininë, por ndjehet rehat me largimin e saj nga vendi. Eksodi që po prek rininë shqiptare, është këmbanë alarmi për cdo qeveri, pasi kështu shumë shpejt do jemi një vend i boshatisur.
Rinia shqiptare, e aftë të ndryshojë këtë sistem që po degradon dita-ditës, duhet të ngrihet fuqishëm për të marrë fatin e vendit në duar dhe për ti dhënë Shqipërisë frymëmarrjen e duhur.
Le të jetë ky konstatim i imi, një thirrje për të gjithë bashkëmoshatarët e mi, që së ashku të ngrihemi dhe me forcën tonë të brendshme, me energjitë tona që burojnë nga idealizmi për ta bërë vendin tonë të begatë, të ndryshojmë mentalitetin qeverisës, duke bërë të shporren një herë e përgjithmonë ajo pjesë e politikës që me zullumet e tyre, po mbajnë peng të ardhmen e integrimit të Shqipërisë!
Viti 2020, ku padyshim, është një vit me zhvillime të mëdha politike, të kosniderohet viti i kthesës dhe i shporrjes përfundimtare të klikës qeverisëse dhe të shpurës së tij kriminale.
Me këtë thirrje dua ta mbyll urimin tim, duke u dëshiruar shqiptarëve mbarësi dhe një vit të suksesshëm në plotësimin e aspiratave të tyre.
