Çdo njeri e di se një vulë është një objekt dhe në cilësinë e një objekti nuk merr frymë. Si rrjedhim, nuk mund të zhvendoset nga një hapësirë tek një tjetër pa mbështetjen e një frymori që e ndihmon të zhvendoset.
Një lajm tronditi çdo qytetar dje. Në Arkivën e Shtetit zhduket një vulë me rëndësi historike. Të dhënat mbi vulën citohen ndryshe nga një lajm tek tjetri, por folja “zhduk” nuk ndryshon në asnjë lajm. Kushdo që ka një minimum kulture institucionale do të ndihej krejt i fyer nga ky lajm për këto arsye;
1. Çdo objekt në një Institucion merret në dorëzim nga një specialist që punon pranë këtij institucioni dhe ky specialist është përgjegjës për ta ruajtur këtë objekt dhe për të mos ta dëmtuar këtë të fundit.
2. Në rastet kur një objekt duhet të zhvendoset nga një hapësirë në një tjetër, atëherë specialisti që është përgjegjës për këtë objekt, harton një procesverbal përmes të cilit ia dorëzon një specialisti tjetër këtë objekt dhe ky procesverbal firmoset nga të dy specialistët.
3. Folja ” zhduk” përmes së cilës është përshkruar kjo ngjarje, nuk bën gjë tjetër veçse dëshmon një papërgjegjshmëri të mirëfilltë profesionale dhe institucionale.
Post Scriptum- Folja ” u zhduk” është thelbi dhe fytyra aktuale e Shqipërisë.
