Partia Lëvizja e Legalitetit (PLL) ka dalë publikisht kundër projektit të propozuar nga Partia Socialiste për reformën e re territoriale, duke e cilësuar atë një hap që dëmton identitetin historik të komuniteteve dhe forcon centralizimin e pushtetit vendor.
Në reagimin e saj, PLL shpreh kundërshtimin e plotë ndaj draftit që parashikon uljen e numrit të bashkive nga 61 në 46, përmes shkrirjes së 15 bashkive, mes tyre Fushë-Arrëzi, Klosi, Rrogozhina, Dimali, Poliçani, Patosi, Divjaka, Selenica, Maliqi, Këlcyra, Memaliaj, Libohova, Cërriku, Belshi dhe Përrenjasi.
Sipas PLL-së, këto bashki nuk janë thjesht njësi administrative, por përfaqësojnë komunitete me histori, tradita dhe identitet të veçantë, të cilat nuk mund të zhduken përmes një vendimi administrativ.
Partia thekson se reforma e propozuar nuk i shërben decentralizimit, por përkundrazi rrit centralizimin, duke larguar shërbimet publike nga qytetarët, duke shtuar burokracinë dhe duke dobësuar përfaqësimin e komuniteteve lokale.
Në deklaratë, PLL riafirmon angazhimin e saj për të mbrojtur pushtetin vendor dhe identitetin e çdo komuniteti, duke u pozicionuar si një forcë politike që do të jetë në krah të qytetarëve për çështjet që prekin historinë, traditat dhe të drejtat e tyre.
“Shqipëria ka nevojë për më shumë decentralizim, më shumë demokraci vendore dhe më shumë respekt për historinë e saj, jo për shkrirjen e identitetit të komuniteteve,” thuhet në reagimin e Partisë Lëvizja e Legalitetit.
Reagimi i plotë:
Partia Lëvizja e Legalitetit kundër shkrirjes së bashkive!
Mbrojmë identitetin historik dhe përfaqësimin e qytetarëve!
Partia Lëvizja e Legalitetit shpreh kundërshtimin e saj të plotë ndaj draftit të propozuar nga Partia Socialiste për reformën e re territoriale, draft i cili parashikon uljen e numrit të bashkive nga 61 në 46, përmes shkrirjes së 15 bashkive me histori, tradita dhe identitet të spikatur.
Bashki si Fushë-Arrëzi, Klosi, Rrogozhina, Dimali, Poliçani, Patosi, Divjaka, Selenica, Maliqi, Këlcyra, Memaliaj, Libohova, Cërriku, Belshi dhe Përrenjasi nuk janë thjesht njësi administrative. Ato përfaqësojnë komunitete me identitet të ndërtuar ndër dekada, me trashëgimi historike, kulturore dhe ekonomike që nuk mund të fshihen me një vendim administrativ.
Partia Lëvizja e Legalitetit vlerëson se ky projekt nuk i shërben decentralizimit, por përkundrazi thellon centralizimin e pushtetit vendor. Shkrirja e bashkive do t’i largojë shërbimet publike nga qytetarët, do të rrisë burokracinë, do ta bëjë më të vështirë aksesin në administratë dhe do të dobësojë përfaqësimin e komuniteteve lokale.
PLL do të jetë gjithmonë në krah të çdo qytetari dhe çdo komuniteti që kërkon të mbrojë identitetin, historinë dhe të drejtën për një pushtet vendor sa më pranë njerëzve.
Shqipëria ka nevojë për më shumë decentralizim, më shumë demokraci vendore dhe më shumë respekt për historinë e saj dhe jo për shkrirjen e identitetit të komuniteteve.
