Euro vijon prej disa kohësh në vendin tonë të jetë në rënie, teksa ditët e fundit ka arritur në nivele rekord.
E pyetur nga gazetarët në lidhje me këtë, ministrja e Ekonomisë Delina Ibrahimaj tha se ka ndikuar hyrjet nga turizmi, remitancat dhe investimet e huaja.
Po si duket një mendim ndryshe ka deputetja e PD, Jorida Tabaku. Me anë të një postimi në rrjetet sociale ajo shkruan se sa herë në Shqipëri ka zgjedhje po aq herë arrihen rekordet negative të rënies së euros.
Sipas Tabakut arsyet zhvelrësimit të euros janë si pasojë e pazarit politik me blerje votash dhe paranë e pistë që kontribuon tek fushata.
Postimi i plotë i Jorida Tabakut:
Sa herë në Shqipëri ka zgjedhje po aq herë arrihen rekordet negative të rënies së euros.
Pse bie euro dhe vlerësohet leku? Kjo nuk ndodh se ekonomia jonë po shkëlqen, as se remitancat po zhvlerësojnë euron; përkundrazi situata është gri dhe parashikohet edhe më gri!
Nuk është e vlerësuar monedha jonë sepse kemi një ekonomi më të fortë! As se po na mbysin turistët e huaj që janë derdhur në Shqipëri për të shpenzuar miliona!
Rekordi i zhvlerësimit të euros është si pasojë e pazarit politik me blerje votash dhe paranë e pistë që kontribuon sot sa tek betoni por më shumë tek fushata!
Mos u gënjeni nga slogani pemëve që në fakt mbulon të vërtetën e parave të pista që po i hapin gropën ekonomisë sonë!
Mos i përbuzni shqiptarët me gënjeshtra kur të gjithë e dinë të vërtetën që jehon nga betoni në zemër të Shqipërisë dhe shpërndahet në çdo skaj; pastrimi i parave dhe një qeveri në shërbim të këtij pastrimi!
