Armand Shkullaku ka folur për aferën e inceneratorëve, nisur edhe nga skandalet e fundit që janë zbuluar, ku disa personave anonimë dyshohet se u është përdorur identiteti, për të qarkulluar miliona euro me kompani fiktive.
I ftuar në emisionin “Të Paekspozuarit” në MCN TV, Shkullaku tha se në rastin e inceneratorëve kemi të bëjmë me një vjedhje shtetërore, por kjo tashmë është e ditur dhe turpi i mbetet drejtësisë që nuk e heton.
“Që qeveria është ë korruptuar e dimë. Gjithë ideja ka qenë gjetja e PPP dhe koncesioneve për të fituar para pa bërë asgjë. Shuma marramendëse e inceneratorëve është paguar dhe ne nuk djegim. Pra janë gjenialë në këto shpikje. Dikur bëhej korrupsion, por mbetej vepra. Tani kanë bërë një gjë që mbetet vetëm ajër dhe lekët shkojnë në xhepat e tyre.
Ky është skandal i madh sa i takon drejtësisë. Është dështim i plotë i drejtësisë së re.
Kur ka dalë për herë të parë afera e inceneratorit, edhe një prokuror i zakonshëm me ndërgjegje qytetare, do thoshte, çfarë po ndodh? Kemi mbledhje qeveria, sepse kryetari legjendar i Elbasanit ka shpallur emergjencë. Qeveria mblidhet dhe merr 19 VKM brenda ditës. Bën kontratë dhe kjo shkon brenda ditës në çdo ministri. I jepet një vajze pa eksperiencë. Kjo kompani e depoziton te banka dhe merr kredi që e shlyen me lekët tona. Mjafton kaq, që një prokurori ti ndizet një llampë.
Fillon ndërtimi inceneratorëve. Revista Monitor ngre alarmin dhe thotë, Elbasani dhe Fieri janë PPP, pra pasi ndërtohen nga privati, shteti paguan pjesë pjesë. Alarmi bie sepse shteti kishte dhënë gati 97% të lekëve dhe ne nuk kishim inceneratorë.
Cfarë ndodhi? Meqenëse punimet ishin me shifra marramedëse, duhet të justifikosh situacionet. Atëherë krijohen kompani fantazmë, sikur kanë shitur beton, hekur, etj. Këtu, nuk ka prokurorë në botë, që nuk sheh një gjë të tillë. Prandaj them është turpi i drejtësisë.
Këta u morën me Lefter Kokën. Ata dyshuan që 3.7 milionë euro i kanë kaluar kompanive fiktive. Tani këtu kanë kaluar shumë miliona, po të tjerët përse nuk i pa njeri? A ka kompani të tjera? Prokurori kur heton, i thotë banka më jep transaksionet që janë bërë. E mbani mend cfarë ndodhi në Komisionin Hetimor, që nuk pranonin të mereshin letra nga banka?
Rreth 2018, kur dolën disa kompani që kishin mashtruar me TVSH, një nga këta ishte edhe Klodian Zoti. Pra ai ka qenë me flamur të kuq këtu. Prandaj nuk është më rastësi. Qeveria e dintë këtë punë. Ka përveç agjensisë që kontrollon cdo koncesion dhe PPP. Ka edhe ata që kontrollojnë punët në terren.
Ka një shkresë që e kanë ndaluar hetimin tatimor të mos hetojë. Do të dalë edhe kjo.
Kryeministri nuk ka thënë asgjë për këtë skandal sepse është i kapur. Një njeri që çon të gjithë grupin parlamentar të bëjë mbledhje asambleje te plehrat e Elbasanit… Nga të gjithë pikëpamjet, është shumë e qartë që skema është e pastër e një vjedhjet të madhe shtetërore. Turpi i mbetet drejtësisë”, tha Shkullaku.
