Nga Marsela LEKLI, psikologe
S’ërisht dhuna në familje trondit aktualitetin në Shqipëri! Një ngjarje e ndodhur pak me pare ka tronditur opinionin publik.Ngjarje tronditëse në Kamëz/ U rrah brutalisht nga babai, 6-vjeçarja në gjendje të rëndë për jetën. Dyshohet për abuzim seksual.
Dhuna kundër fëmijëve ndodh në të gjitha vendet, qofshin ato të pasura apo të varfëra. Nuk ka një faktor të vetëm që shpjegon pse një person sillet në mënyrë të dhunshme, por faktor të ndryshëm mund të luajnë një rol të rëndësishëm, siç është papunësia, varfëria, alkooli dhe keqpërdorimi i drogës si dhe problemet të shëndetit mendor. Dhuna mund të prek të gjitha kategoritë e fëmijëve pa marrë parasysh personalitetin e tyre, prejardhjen, etnitetin, arsimimin, gjininë apo moshën. Disa kategori të fëmijëve janë posaçërisht të rrezikuara nga dhuna, siç janë fëmijët që jetojnë dhe punojnë në rrugë, fëmijët nga minoritetet etnike apo fëmijët me paaftësi.
Disa prej rasteve të dhunës të përjetuara nga fëmijët mund të jenë të papritura, por në shumicën e rasteve fëmijët e përjetojnë dhunën nga njerëzit që i njohin dhe iu besojnë, siç janë prindërit, të afërmit, mësuesit, i dashuri/e dashura, shokët e shkollës dhe punëdhënësit.
Familjet zakonisht perceptohen si vende të besimit të ndërsjellë, por ndonjëherë ato mund të jenë edhe të rrezikshme për fëmijët; të qenit dëshmitarë apo të përjetuarit e dhunës gjithmonë ndikon te fëmijët.
Dhuna mund të ndikojë në jetët e fëmijëve shumë vite më vonë, dhe fëmijët të cilët janë dëshmitarë ose kanë përjetuar dhunë si fëmijë janë më të rrezikuar të përjetojnë dhunë përsëri më vonë në jetët e tyre.
Në mënyrë që të parandalohet dhuna kundër fëmijëve në të ardhmen, është me rëndësi të përfshihemi në një dialog të hapur rreth besimeve lidhur me dhunën që i lëndon.
