Partia Demokratike në këto zgjedhje ka vendosur të transformojë politikën shqiptare duke transformuar veten e saj, duke nxjerrë njerëz të rinj, profesionistë, me integritet, të papërfolur dhe duke i rreshtuar ata në rreshtin e parë të politikës.
I tillë është Alfred Rushaj.
Alfred Rushaj simbolizon modelin e qytetarit të cilin shoqëria shqiptare ka nevojë ta ketë në politikë, në parlament dhe në institucione. Njeri i qetë, argumentues dhe profesionist. Alfred Rushaj njihet si basketbollist por ai është një ndër juristët më të aftë që ka Shqipëria.
I shkolluar për drejtësi, prej vitit 1998 deri në vitin 2005, Alfred Rushaj ka mbajtur pozicione të ndryshme ekzekutive dhe manaxheriale në Korporatën Elektroenergjitike Shqiptare (K.E.Sh). Prej 2005 deri në vitin 2009, z.Rushaj ka punuar si këshilltar juridik në ministrinë e Ekonomisë, Tregtisë dhe Energjitikës. Më pas prej 2009 deri në 2013, ka shërbyer si zv.ministër i financave.
Alfred Rushaj është themelues i kompanisë Frost&Fire Consulting, kompani konsulence mbi ligjet e taksave, prokurimet publike, burimet natyrore etj. Pra z.Rushaj është një profesionist në politikë, një njeri i cili politikës i sjell me vete edhe një përvojë profesionale cilësore. Shqipëria ka nevojë që politikanët, deputetët dhe ministrat, drejtorët dhe kryebashkiakët t’i ketë njerëz me profesione, jo njerëz pa karrierë e pa profesion të cilët nuk dinë të kryejnë asnjë punë tjetër përveç politikës, profesioni i tyre bëhet politika dhe ata nuk duan të largohen sepse skanë me çfarë të merren. Kështu ata bëjnë gjithçka për të mos u shqitur nga karrigia.
Me Alfred Rushajn dhe të tjerë, qeverisja në Shqipëri ka gjasa të jetë më e pjekur, më profesionale dhe më e kujdesshme me njerëzit dhe me ligjin. Alfred Rushaj është një ndër qindra arsyet pse shqiptarët me 25 prill duhet të votojnë Partinë Demokratike dhe tu japin njerëzve si Rushaj një mundësi për të qeverisur, për të treguar kush janë dhe çfarë munden të bëjnë. E me shumë mundësi do të bëjnë disa punë të mira.
