Nga Dritan SHANO
-Hej shqiptarë! Mos e harroni atë videon ku disa policë algjerianë i hynë në dru njerëzve, dhe kryeministri tha se ja çbën policia në Spanjë – vend i BE. Ideja ishte që mos u çudisni kur t’ju hyjmë në dru dhe juve. Qeveria do vazhdojë të fabrikojë papushim “Masa Mbrojtëse” të cilat ju s’do keni çtë bëni, por do i shkelni. Pastaj, vu druri. Pse, kujtoni ju se doli Shqipëria nga Konventa e të Drejtave të Njeriut. Sepse po të kishte ndenjur brenda, atje njeriu ka absolutisht të drejtë ta kundërshtojë qeverinë, ndërsa qeveria nuk ka absolutisht të drejtë t’i detyrojë njerëzit t’i binden asaj.
-Njerëzit e duan jetën e tyre, shumë më tepër sesa qeveria e do jetën e tyre. Për këtë arsye njerëzit dalin, takohen, ecin, vrapojnë, marrin frymë thellë, punojnë. Sepse vetëm kështu ruhet shëndeti imunitar. Përballë shëndetit imunitar, mjekësia dhe qeveria janë si ç’është një karrocë me kushineta përballë një Lamborghini. Izolimi e asgjëson shëndetin imunitar. Sa më gjatë, aq më përfundimisht. Qeveritë që vazhdojnë me strategjinë e izolimit po asgjësojnë shëndetin imunitar të njerëzve. Kjo do ishte genocid. Nëse virusi kthehet pas një farë kohe, mundësia që të vrasë këdo që prek është shumë e lartë, për shkak të mungesës së imunitetit të dobësuar nga izolimi.
-Qeveritë perëndimore po hapin vendet e tyre, po heqin dorë nga pengmarrja e jetës, ekonomisë, ndoshta më shpejt se sa do kishin kënaqësi dhe dëshirë ta bënin, por janë të detyruara ta bëjnë për shkak se kanë kuptuar që e qelbën më këtë propozimin e “më shumë siguri për më pak liri”. Sepse këto qeveri e dinë se nuk do mjaftonin miliona të vdekur që ato të justifikonin vendosjen e kontrollit mbi gjithçka, dhe sidomos mbi ekonominë. Jo për gjë, po liria ekonomike është në themel të demokracisë, dhe kjo liri i përket individit, dhe jo qeverisë, së cilës nesër i duhet të marrë votat e individëve. Përpos kësaj kryeministrat e qeverive perëndimore e kanë kuptuar që nuk mund të pretendojnë se janë ata që po i mbrojnë njerëzit nga virusi, sepse do ishte njësoj sikur të thoshin se po i mbrojnë njerëzit nga UFO-t.
-Qeveria jonë, e cila nuk pjerdh për vota se ka mbështetje mbi 61%, ndjen se nuk ka pse ta lëshojë këtë kënaqësi nga dora dhe po e shndërron “karantinën” në “tetëdhjetinë”. Pse? Ushtari i shkretë, të cilin e kishin qethur tullë dhe i kishin futur klorin në ushqim, kur mbaronte karantinën nuk mbante mend as emrin e babës, as të nonës; njihte vetëm emrin e oficerit dhe Nënën Parti. Për të arritur këtë gjëndje vegjetative më ç’duket nuk paskan mjaftuar 40 ditë, prandaj qeveria jonë do ta shtyje karantinën edhe 60 ditë të tjera për të arritur rezultate të qëndrueshme. Dhe që askujt mos t’i shkojë ndërmend të mos besojë se nga virusi i shpëtoi, ai dhe vetem ai, Baba i Kombit, se ndryshe do kishin vdekur palë palë.
-I gjithë ky zbor me njerëzit ka të bëjë me squlljen përfundimtare të lirisë së individit dhe sigurimin e skllavërisë, varësisë totale ndaj shtetit. E keni parasysh atë proçesin e përplasjes së oktapodit pas shkëmbit që të mund ta hash më kollaj. Ja këtë po na bëjnë qeveritë, duke na izoluar dhe ndaluar ekonominë, për të mirën e përgjithshme. Se të gjitha liritë, pa lirinë ekonomike janë kot, janë “liri figurante”. Ekonomia jonë për 2020 iku e vate. Ndoshta dhe ajo e 2021. Hesapet bëjini vetë ju. Si ju del më mirë, të jeni njerëz të lirë, apo skllevër të qeverisë, që vrisni njëri tjetrin për pak privilegj, për pak racion nga qeveria.
