Ministrja e Shëndetësisë, Ogerta Manastirliu, ka publikuar rregullat, që synojnë mbrojtjen nga koronavirusi, por edhe parandalimin e përhapjes së tij.
Manastirliu fton qytetarët të bashkëpunojnë në respektimin e tyre për të frenuar përhapjen e mëtejshme të Covid 19. Deri më tani në Shqipëri zyrtarisht janë konfirmuar 10 raste, ku veç 3 pacientëve të parë që kanë pasur udhëtime në Itali, të infektuarit e tjerë janë familjarë të tyre.
Tetë rregullat e reja:
-Ndalohen aktivitetet sportive, kulturore, konferenca, koncerte, tubime dhe dëgjesa publike deri me datë 3 Prill.
-Mbyllen diskot, lokale nate, ambiente përa rgëtim, si qendra sociale, palestra, pishina deri më 3 Prill.
-Restorantet, baret të ofrojnë shërbime për qytetarët duke respektuar distancën prej së paku 1 metër qytetarët nga njëri-tjetri.
-Pezullohen të gjitha procedurat për konkurset për procedurat për punësim.
-Mbyllen çerdhet dhe institucionet arsimore deri më 23 Mars.
-Ndalohet grumbullimi i pacientëve, shoqëruesve dhe familjarëve në qendra shëndetësore/ spitale ku bëhen vizita ambulatore.
-Kufizohet lëvizja e udhëtarëve me mjetet e transportit publik qytetas, rrethqytetas dhe ndërqytetas për periudhën deri në 3 prill 2020.
-Ndalohen lëvizjet e udhëtarëve me mjetet e transportit ajror dhe detar drejt Italisë.
