“Bashkëpunim mafioz në mesin e pansllavizmit”. e ka konsideruar ish-deputeti Eduart Ndocaj, takimin e liderve të Ballkanit Perëndimor në kuadër të “Mini-Shengenit”, ku tashmë është rritur së tepërmi pakënaqësia ndaj kryeministrit Rama, i cili u bë pjesë e skenarëve që synojnë defaktorizimin e shqiptarëve në rajon.
Ish-deputeti Ndocaj, i njohur për qëndrimet e tij patriotike dhe për mbështetjen e mjaft kauzave me sfond nacionalist, së fundi është treguar mjaft i ashpër ndaj kryeministrit Rama, të cilin gjithnjë e etiketon si “fatkeqësi kombëtare”, duke e shënjestruar për një sërë politikash keqqeverisëse, që po dëmtojnë jo vetëm ekonominë shqiptare duke e bjerrur atë në në ekonomitë më të dobëta të botës, por dhe duke dëmtuar interesat kombëtare, për të cilat shqiptarët janë cfilitur dhe drobitur në shekuj me radhë për të mbrojtur identitetin e tyre.
Më pas Ndocaj, në video-mesazhin e tij, e ka cilësuar Haradinajn një “legjendë të gjallë” të kombit shqiptar, që kaq shumë i ka dhënë cështjes kombëtare, ndaj dhe është e padrejtë dhe tërësisht e ulët deklarata e Ramës në adresë të “Rambos”.
