Nga Helidon Keku
Sot janë të gjithë me flamur
të gjithë i bëhemi nënës pranë
ditës së çjerrjes kuq e zi
Dita e vetme e vitit
ku testojmë zërin deri në ngjirje
dhe grushtet godasin
dërrasën e kraharorit
dhe ritmi i goditjes buçet si daulle
valles që hedhim Bulevardeve të Botës
Po, për një ditë jemi të gjithë patriot
kuq e zi gjithandej
sot sfidojmë edhe Botën
që nuk ka ditë flamuri
Sot dehemi të gjithë duhmës kombëtare
me alkolin e patriotizmit
dhe e nesërmja na gjen me të vjella
dhe dhimbje koke
organizmit qumështor
mpir për gjithë vitin
Dhe agu tkurret sërish
gjëmimit të këmbanave
paralajmërimit të kopes
së demave të nxirë
që urryen
dhe urrejnë të kuqen.
