Kreu i PLL, Shpëtim Axhami mori pjesë në Festën Mbretërore të 10 Majit, organizuar në kopshtet e Pallatit Elisabeta në Bukuresht, në një ceremoni madhështore që këtë vit shënoi 160-vjetorin e themelimit të Shtëpisë Mbretërore dhe të shtetit modern rumun.
Në këtë aktivitet të rëndësishëm ndërkombëtar ishte i pranishëm edhe Princi Leka II, ndërsa z. Axhami e cilësoi pjesëmarrjen si një kënaqësi dhe nder të veçantë.
Gjatë ceremonisë, kreu i Lëvizjes së Legalitetit zhvilloi takime të rëndësishme me Mbretëreshën Margareta, Princin Radu, si dhe me përfaqësues të tjerë të Familjes Mbretërore Rumune, duke vlerësuar marrëdhëniet tradicionale dhe bashkëpunimin e shkëlqyer mes dy familjeve mbretërore.
Në mesazhin e tij publik, z. Axhami theksoi rëndësinë e forcimit të lidhjeve ndërmjet Familjes Mbretërore Shqiptare dhe Familjes Mbretërore Rumune, duke vlerësuar gjithashtu angazhimin diplomatik dhe euroatlantik të Princit Leka II në shërbim të interesave kombëtare shqiptare.
Sipas kreut të legalistëve, vetëm një vizion i ri politik dhe institucional mund të garantojë stabilitet ekonomik, prosperitet dhe integrim të plotë europian për Shqipërinë. Ai e cilësoi bashkëpunimin me partnerët ndërkombëtarë dhe promovimin e vlerave tradicionale kombëtare si elemente kyçe për të ardhmen e vendit.
Pjesëmarrja e Shpëtim Axhamit në këtë ceremoni prestigjioze vlerësohet si një tjetër dëshmi e profilit të tij diplomatik dhe e rolit aktiv që ai dhe legalistët shqiptarë synojnë të kenë në forcimin e marrëdhënieve ndërkombëtare dhe promovimin e çështjes kombëtare shqiptare.
