Ish kryeministri Sali Berisha, i ftuar në emisionin “Opinion”, ka folur për rihapjen e procesit për vrasjen e Azem Hajdarit. Berisha e konsideroi këtë, një lëvizje politike dhe akuzoi kryeministrin Edi Rama, se kërkon të “nxjerrë nga burgu Jaho Salihin dhe Izet Haxhinë”.
“Ky është një proces i dytë politik, Edi Rama hakmerret për Nexhmije Hoxhën, për Kristaq Ramën. Hapet procesi, për të nxjerrë nga burgu vrasësin e kushedi sa personave, që është Jaho Salihi dhe për të nxjerrë jashtë Izet Haxhinë. Qëllimi i Edi Ramës, është të realizojë atë skenar që realizoi me Dritan Dajtin. Ka marrë përsipër të nxjerrë nga burgu Jaho Salihin, sepse ai kreu krim në emër të baballarëve të tij.
Të hapësh një proces, i cili ka kaluar të gjitha shkallët, përfshirë Gjykatën Kushtetuese, këtë mund ta bëjë vetëm ai”, tha Berisha.
Berisha deklaroi së nuk është thirrur asnjëherë nga prokuroria, apo gjykata për të dëshmuar dhe se i ka dhënë të gjitha deklarimet e tij në të shkuarën.
“Ata që humbën pushtetin e tyre terrorist, qëndrojnë me të gjithë fuqitë e tyre, siç qëndruan pas atentatit. Nuk jam ftuar asnjëherë as nga gjykata dhe as nga prokuroria, kurrë në jetën time. Nuk ka një organ, një media, që të vërtetojë të kundërtën e kësaj që them unë.
Fatos Klosi dhe ish bashkëpunëtori i sigurimit të shtetit, Arben Rakipi, bënin lojë dhe skupe, sepse nuk më thërrisnin dot. Për dy fakte, e para, unë do t’ju bëja pretencë politike atyre, e dyta unë nuk isha dëshmitar okular. Unë kisha qenë në zyrë, cfarëdo të dëshmoja unë, nuk merrte fuqinë e një prove pa u verifikuar.
Së treti, vetëm në harkun kohor 12 orë, unë kam bërë 3 konferenca shtypi, pa thënë prononcimet për cdo informacion që unë disponoja. Unë, Sali Berisha, kam denoncuar publikisht çdo të dhënë që ka ardhur, kam denoncuar publikisht vrasjen shtetërore.
Çfarë ishte banda terroriste e Haklajve? E zakonshme? Jo bandë shtetërore me spaleta. Bandë ishte edhe Zani Caushi, por nuk u bë shef komisariati. Ishte edhe Gjolek Malaj, por nuk u bë shef komisariati. Vrasësit Haklaj morën komisariatin për t’u hakmarr në emër të regjimit që u përmbys. E vrau shteti, Azem Hajdarin”, tha Berisha.
I pyetur nga moderatori, se kush e nxorri në pritë Azem Hajdarin, Berisha tha: “Po të më pyesësh mua, në pritë e nxorri Fatos Klosi”.
