Nga Elona CASLLI
Nuk sfidohet gjinia, sfidohet standardi
Grua- Të jesh grua, për Sabinën është një gjendje që nuk e ka zgjedhur vetë. Atë që nuk kemi zgjedhur nuk mund ta konsiderojmë as si meritë, as si dështim. Sabina mendon se përballë fatit që na imponohet, duhet gjetur një qëndrim i përshtatshëm. Të revoltohesh kundër faktit që ke lindur grua, i duket po aq absurde sa edhe të krenohesh për këtë.
Milan Kundera- Lehtësia e padurueshme e qënies
E zgjodha qëllimisht këtë paragraf nga një personazh simpatik i Kunderës, pasi trajton në thelb motivin e këtij shkrimi. Kushdo që ka pasur mundësinë të shihte emisionin e Eni Vasilit mbrëmë, i janë vrarë sytë, nga pamja e një gruaje që jo vetëm gënjen me një paturpësi të frikshme, por edhe që orvatet sistematikisht të mashkullarizohet në debat.
Fenomeni i mashkullarizimit tek grate në politikë është një fenomen primitiv dhe i dhimbshëm. Është krijuar bindja se një grua në politikë duhet të sfidojë burrat e si rrjedhim duhet të përpiqet t’u ngjajë më shumë atyre në fjalor dhe në qasjen ndaj debatit. Duket se gati-gati të qenit grua shihet si një gjymtim në politikë. Një gjymtim që duhet mbuluar me anë të përpjekjeve të vazhdueshme për t’u mashkullarizuar.
Ndërkohë është krejt e kundërta. Një grua në politikë duhet të sfidojë standardin e një burri dhe jo gjininë e tij. Një grua në debat duhet të peshojë argumentin dhe jo gjininë.
Për fat të keq, shumë diskutime në studio televizive dhe jo vetëm, na përballin gjithnjë e më shumë me gra që rendin t’u ngjajnë burrave në politikë.
E ky fakt është tragjik, pasi nuk është turp të jesh grua; nuk është turp të jesh një grua e përmbajtur; nuk është turp të jesh një grua që mendon.
Besoj fort se modeli aktual i gruas në politikë, nuk përfaqëson gruan e mirëfilltë shqiptare.
Ky model do ta përfaqësonte gruan e mirëfilltë shqiptare, nëse do të ishte modeli i një gruaje që gjatë debatit me një burrë shfaq një standard ndryshe që e sfidon standardin tradicional të një gruaje politikane që çirret dhe ulëret në spiralen e mosarsyetimit.
Post Scriptum- Një grua që mendon sfidon standardin e jo gjininë.
