26 shtator 1944. 21 banorë të Buzmadhes u ekzekutuan pa gjyq në Krue të Bardhë. Tetë dekada më pas, ngjarja rikthehet në vëmendjen publike përmes një apeli të kryetarit të Partisë së Lëvizjes së Legalitetit, Shpëtim Axhami, i cili prej vitesh e ka vendosur në qendër të qëndrimeve të tij publike dokumentimin e krimeve të diktaturës dhe ruajtjen e kujtesës për viktimat.
Në 82-vjetorin e ngjarjes, Axhami e cilëson Masakrën e Buzmadhes si një prej episodeve tragjike të konfliktit politik të viteve të fundit të Luftës së Dytë Botërore. Ai kërkon që viktimat të mos mbeten vetëm emra në dokumente historike, por pjesë e një kujtese të gjallë kombëtare.
Apeli i tij shkon përtej përkujtimit të një date. Dokumentimi i krimeve, zbardhja e fatit të të zhdukurve dhe nderimi i viktimave të komunizmit janë, sipas Axhamit, çështje që kërkojnë ndërgjegjësim të vazhdueshëm publik.
Në qëndrimin e tij, kreu i PLL-së rikthen gjithashtu debatin mbi atë që ai e përshkruan si dhunë politike dhe hakmarrje ndaj kundërshtarëve gjatë periudhës së luftës, duke kërkuar që këto ngjarje të njihen dhe të dokumentohen.
Masakra e Buzmadhes mbetet një prej ngjarjeve që Axhami ka zgjedhur ta rikthejë në kujtesën publike, në kuadër të apelimit të tij të vazhdueshëm për zbardhjen e krimeve të komunizmit.
Postimi i plotë i Shpëtim Axhamit:
MASAKRA E BUZMADHES, TERROR KOMUNIST PËR PUSHTET!
82 vite më parë, më 26 shtator 1944, në Krue të Bardhë të krahinës së Lumës, forcat e Brigadës V partizane, nën komandën e Shefqet Peçit, ekzekutuan me pa të drejtë pa gjyq 21 banorë civilë të fshatit Buzmadhe.
Masakra e Buzmadhes është një nga ngjarjet më tragjike të vëllavrasjes politike përgjatë Luftës Dytë Botërore që dëshmon qartë, se në Shqipëri lufta për pushtet nuk njohu kufij duke u kthyer në luftë civile kundër nacionalistëve.
Dënimi i krimeve të diktaturës, dokumentimi i tyre, zbardhja e fatit të të zhdukurve dhe nderimi i viktimave të komunizmit janë një detyrim kombëtar dhe drejtësi për kujtesë që këto lloj krimesh të mos përsëriten.
Lavdi martirëve antikomunist të Masakrës së Buzmadhes 🇦🇱
