Makineri perfekte! Bayern Munich fiton Champions League dhe mbyll një ecuri të frikshme dhe për rekord në historinë e Kupës së Kampionëve, duke i fituar të gjitha ndeshjet nga faza e grupeve e deri në finale.
Heroi është djali i kristaltë, njeriu të cilit nuk i besoi Juventusi dikur, por e bëri ekipi gjerman: Kingsley Coman!
Një krosim i Kimmich dhe goditje me kokë që mposht Navas. Mjafton kaq për t’i dhënë Champions e 6-të në histori Bayern duke e vendosur pas Milan (7) dhe pas Real Madrid, 13!
Për Coman ky gol ka edhe një vlerë historike në Champions, duke qenë goli i parë i një ish-lojtari të ekipit kundërshtar (u rrit te PSG dhe iku te Juventusi)…
Natë e errët për yjet Mbappe-Neymar, që kanë shpërdoruar pafund dhe kanë qenë të pasaktë atëherë kur duhej! Pikërisht ata të dy, vlera e të cilëve është 4-fish sa gjithë vlera me të cilën është ndërtuar Bayern Munich.
Eshtë edhe suksesi i Hansi Flick, që diti të ndërtonte një ekip “tanks”, që shkërmoqi çdo kundërshtar dhe ngriti trofeun në një vit pandemik!
Lewandowski nuk mundi të realizonte në finale, duke u ndalur nga shtylla… Mbyllet kështu sezoni më i çmendur dhe i pabesueshëm i historisë së futbollit!
BAYERN FESTON, PSG NË LOT!
