Kryetarja e Grupit demokrat të opozitës parlamentare deklaroi sot se është kërcënuar në ambientet e zyrës së saj në kryesinë e Kuvendit.
Nga foltorja e Kuvendit, Rudina Hajdari tha se ishte shantazhuar nga deputetë dhe i kërkoi kryetarit të parlamentit Gramoz Ruçi që të marrë masa para se të ketë një viktimë në Parlamentin e Shqipërisë.
Nuk mund të ndodhë sot që në 2019 deputetët të kërcënohen. Është e papranueshme që një femër të kërcënohet.
Kam pasur raste që persona kanë ardhur në zyrën time dhe më kanë kërcënuar. Nuk mundet që kjo të ndodhë më, ka ikur ajo kohë. Ju lutem, zoti kryetar merrni masa para se të kemi një viktimë këtu në Parlament. Ju kërkoj edhe njëherë se siç janë masat këtu në Kuvendin e Shqipërisë të jenë të njëjtat masa edhe në Kryesinë e Kuvendit.
Kreu Kuvendit, Gramoz Ruçi iu përgjigj duke thënë se shkresën e dërguar nga Hajdari ia ka përcjellë Ministrisë së Brendshme për marrjen e masave. Gjithashtu tha se u ka kërkuar punonjësve të shërbimit të bëjnë detyrën e tyre sipas ligjit.
Gramoz Ruçi:“Zonja Hajdari e kam marrë shkresën tuaj. Edhe njëherë u kam kërkuar punonjësve të shërbimit që brenda sallës së Kuvendit dhe godinës së Kryesisë së Parlamentit të bëjnë detyrën e tyre sipas ligjit dhe udhëzimeve përkatëse me të gjitha ato shqetësime që ngritët juve.
Nga ana tjetër kërkesën tuaj, në mënyrë të posaçme kërkesën tuaj ja kam përcjellë Ministrisë së Brendshme, ku sipas statusit të deputetes dhe kërkesës, të merren masa për shqetësimet që keni ngritur në kërkesën që keni përcjellë dhe trajtuar në seancën e Parlamentit.”
