Besarta Basha
Pas shtyrjes me disa muaj vonesë, Qendra e Shërbimeve Arsimore është gati të testojë mësuesit e rinj në sezonin XIV të provimeve të shtetit. Ato do të nisin pas dy ditësh e do të zgjasin një muaj, përgjatë të cilit do të futen në provim mijëra mësues të profileve të ndryshme. Të interesuarit gjejnë në tabelën përbri datat e zhvillimit të provimit të degës, për të cilën kanë mbaruar studimet.
Në pritje të listës emërore me orën e saktë, ata mund të ushtrohen me aplikacionin e provimeve të shtetit apo të lexojnë fondin prej mijëra pyetjesh, nga e cila do të përzgjidhet rastësisht nga kompjuteri teza finale. Kjo e fundit nuk do të ketë asnjë ndryshim nga sezonet e kaluara. Është e gjitha me alternativa dhe nevojiten përgjigjet e sakta të gjysmës për t’u konsideruar kalues. Edhe nëse nuk arrijnë me të parën, janë një pafundësi mundësish deri në marrjen e testimit.
Mjafton pagesa e një tarife fikse, që vjen në rritje me 2500 lekë për çdo herë që futen në test, deri në kalimin e tij me sukses. Vitin e kaluar, qeveria hoqi kufizimin deri në 5 herë për provimin e shtetit. Më të shumtët në numër, mësuesit e arsimit fillor dhe ata të Gjuhës shqipe e Letërsisë do të jenë të parët që do të testohen përgjatë dy javëve të para të sezonit XIV të provimeve të shtetit, që do të mbyllet në fundin e nëntorit me mësuesit e rinj të Fizikës dhe shkencave sociale. Pa licencën, ata nuk ushtrojnë dot profesionin për të cilin kanë investuar për vite me radhë, në shkollim, Bachelor e Master profesional si dhe praktikë 1- vjeçare.
Ajo që duhet të kenë parasysh kandidatët për mësues, përveç korrektësisë me orën (paraqitja 30 minuta përpara), janë dokumentet që duhen pasur me vete në datën e caktuar. Mjeti i identifikimit, dokumenti që vërteton pagesën e tarifës dhe diplomat e të dyja cikleve duhen domosdoshmërisht.
Në mungesë të diplomës Master, një vërtetim notash dhe mjeti që vërteton njohjen e gjuhës së huaj. Për të disatën herë, QSHA u tërheq vëmendjen kandidatëve se nuk do të pranohen në provim, ndonëse mund ta kenë paguar tarifën. Kjo e fundit nuk kthehet, edhe në rast se kandidati nuk paraqitet në kohë apo për arsye të vetat, nuk paraqitet në provim.
