Aleatët e Partisë Demokratike i kanë propozuar Lulzim Bashës pak ditë më parë një platformë idesh me 7 pika, që ka si pikësynim institucionalizimin e raportit me PD-në.
Ideatori kryesor i kësaj platforme idesh ka qenë kryetari i Partisë Republikane, Fatmir Mediu. Aleatët e vegjël kërkojnë që të krijohet një tryezë ekzekutive në nivel Sekretari të Përgjithshëm ose n/ kryetarësh, drejtuar nga PD ku secili të jap propozimet e veta për Reformën Zgjedhore apo për tema të ndryshme.
“Tryeza të caktojë takimet me grupet e interesit, përcaktimin dhe organizimin e grupeve të punës për platformën dhe reformat që kalon vendi, me interes kombëtar dhe ndërkombëtar. Reforma Zgjedhore dhe mbështetja e reformës për një drejtësi të pavarur, qëndrim i unifikuar i opozitës për Reformën Zgjedhore dhe Reformën në Drejtësi. Në këtë kuadër, të gjitha partitë e koalicionit të paraqesin opsionet për Reformën Zgjedhore, deri në përcaktimin e një qëndrimi të përbashkët.
Propozimet të paraqiten me shkrim brenda 10 ditëve”, thuhet në platformën e aleatëve. Dalja nga kriza politike është objektivi kryesor i bashkëpunëtorëve të Bashës. Ata propozojnë ngritjen e një grupi pune për t’u takuar me ndërkombëtarët. Ky grup pune do të duhet të përgatisë një dokument për t’ia prezantuar ndërkombëtarëve, në të cilin të përfshihen raportet e ODHIR, DASH etj.
“Përgatitja e një materiali ku të përfshihen: Raporti i ODHIR, Raporti i Departamentit amerikan për krimin dhe trafiqet, raporte të tjera, si dhe qëndrime të mediave ndërkombëtare si Bild, VOA etj., shoqëruar me non-paper nga ana jonë, ku sugjerohen zgjidhje dhe qëndrime të opozitës. Dialogu për zgjidhjen e krizës së rëndë politike me prezencë të ndërkombëtarëve, me prioritet zgjedhjet e lira dhe të ndershme, si rruga për daljen nga kriza. Bashkëpunimi me trupin diplomatik në Tiranë, për zgjidhjet që ofrojmë, duke parashtruar me shkrim qëndrimet tona, për të evituar keqinterpretimet”, shkruhet më tej në draftin me idetë.
Pjesë e kësaj platforme është edhe krijimi i senatit politik, që përfshin figura politike, qeverisëse dhe figura intelektuale dhe të shquara, brenda dhe jashtë vendit. Platforma synon edhe ngritjen e Këshillit të deputetëve, ishministrave, në të gjitha legjislaturat dhe kryetarëve të bashkive, çka duket si një derë që hapet për emrat e njohur të së djathtës, që janë larguar në mëri me lidershipin.
“Të ngrihet Këshilli i ish-deputetëve, ish-ministrave, në të gjitha legjislaturat dhe kryetarëve të bashkive. Të kemi një grup që do të ndjekë gjithë praktikat ligjore, që dalin nga grupet e punës, të analizojnë punën e qeverisë, të bashkëpunojnë me strukturat për të ndërtuar trupën konkurruese, për pushtetin lokal dhe qendror”, janë disa nga propozimet.
Ajo që bie në sy në këtë platformë që i është propozuar kryedemokratit Basha nga aleatët, është edhe afrimi i ish-ministrave dhe ish-kryetarët e bashkive në legjislaturat e kaluara. Detyra e tyre, sipas aleatëve, do të jetë të ndjekin gjithë praktikat ligjore që dalin nga grupet e punës, të analizojnë punën e qeverisë, si dhe të bashkëpunojnë me strukturat, për të ndërtuar trupën konkurruese, për pushtetin lokal dhe qendror.
INSTITUCIONALIZIMI I VENDIMMARRJES SË KRYETARËVE TË KOALICIONIT
Takim minimumi 1 herë në 2 javë i kryetarëve.
Tryeza ekzekutive në nivel Sekretari të Përgjithshëm ose n/ kryetarësh, drejtuar nga PD, e cila të mblidhet një herë në javë
Përgatisin agjendën e veprimit të opozitës
Takimet me grupet e interesit
Përcaktimi dhe organizimi i grupeve të punës për platformën dhe reformat
Reforma Zgjedhore dhe mbështetja e reformës për një drejtësi të pavarur
Qëndrim i unifikuar i opozitës, për Reformën Zgjedhore dhe Reformën në Drejtësi.
Të gjitha partitë e koalicionit të paraqesin opsionet për Reformën Zgjedhore
REFORMA ADMINISTRATIVE
Grup pune për marrëdhëniet me ndërkombëtarët, që përgatit takimet me ndërkombëtarët në Tiranë, Bruksel, Vjenë, Berlin, DC, Londër etj.
Grupi të përgatisë një material ku të përfshihen: Raporti i ODHIR, i DASH për krimin dhe trafiqet, shoqëruar me non-paper nga ana jonë, ku sugjerohen zgjidhje dhe qëndrime të opozitës.
Dialogu për zgjidhjen e krizës së rëndë politike me prezencë të ndërkombëtarëve, me prioritet zgjedhjet e lira dhe të ndershme, si rruga për daljen nga kriza.
Bashkëpunimi me trupin diplomatik në Tiranë, për zgjidhjet që ofrojmë, duke parashtruar me shkrim qëndrimet tona, për të evituar keqinterpretimet.
KRIJIMI I SENATIT TË OPOZITËS
Figura politike dhe qeverisëse të opozitës, si dhe figura intelektuale të artit, mjekësisë, universiteteve, kulturës, me figura të shquara, që janë jashtë vendit.
Afrimi i intelektualëve me emër, në emër të bashkëqeverisjes.
Këshilli i ish-deputetëve, ish-ministrave, në të gjitha legjislaturat dhe kryetarëve të bashkive.
