Nga Elona Caslli
Rilindas, teksa në këtë kohë të marrë – Kushtetutën – e keni kthyer në kryefjalë të alibisë suaj për ta shpënë vendin drejt zgjidhjeve tuaja dhe jo drejt zgjedhjeve, ju bëj me dije se, as me mendim nuk ju takon të takoheni me Kushtetutën e vendit.
Duke qenë krejt e ndërgjegjshme se nuk jeni gjë tjetër veçse dublantë të përpiktë të Kryeministrit të vendit, ju rikujtoj faktin se ishte pikërisht ky Kryeministër që e ka shpërfillur Kushtetutën e vendit me “ “Ligjin e posaçëm’’ mbi shembjen e Teatrit Kombëtar dhe me shumë marrëzira të tjera, të cilat shfaqen në shtypin e huaj.
Shenjtërinë e Kushtetutës, duhet t’ia recitoni fillimisht vetvetes e mandej popullit shqiptar.
Të përmendësh Kushtetutën është një gjë. Ta respektosh Kushtetutën është një gjë tjetër.
Përpjekjet tuaja deri në dhimbje, për ta paraqitur Kryebashkiakun si model pune dhe virtyti janë të denja veçse për mëshirë.
Sikundër është e denjë për mëshirë, prania e shumë pseudointelektualëve pranë këtij të fundit.
Ju mund të jeni zanatçinj të mirë në fushat tuaja, por në nivelin e intelektualit nuk do të ngriheni kurrë.
Një intelektual nuk mund të jetë kurrë një dublant.
Ai ka zërin e tij të mëvetësishëm kurdo dhe kudo.
Post Scriptum- Nuk mjafton qoftë edhe prania e Gjeniut të Letrave Shqipe, për ta pastruar figurën e një Kryebashkiaku, i cili e ka gjymtuar dhe e ka plaçkitur me vetëdije të plotë këtë qytet.
