Partia Lëvizja e Legalitetit (PLL) ka reaguar pas ngjarjeve të ndodhura gjatë protestës së zhvilluar sot para Parlamentit, duke dënuar atë që e cilëson si dhunë të ushtruar nga forcat e policisë ndaj protestuesve.
Në një deklaratë publike, PLL shprehet se është e papranueshme që qytetarë, të moshuar dhe të rinj, të trajtohen me forcë dhe të tërhiqen zvarrë gjatë ushtrimit të së drejtës së tyre për të protestuar. Sipas partisë, sjellje të tilla cenojnë dinjitetin njerëzor, shkelin të drejtat themelore dhe dëmtojnë besimin e qytetarëve ndaj institucioneve demokratike.
Në reagimin e saj, PLL thekson se ashpërsimi i ndërhyrjeve policore është tregues i frikës së pushtetit përballë qytetarëve dhe zërit të protestës.
“Sa më e ashpër të bëhet dhuna shtetërore dhe policore, aq më shumë dëshmohet frika e një pushteti të korruptuar përballë qytetarëve dhe zërit të tyre, i cili është ngritur kohët e fundit në rrugët e Tiranës dhe sot para Parlamentit”, thuhet në deklaratë.
Në përfundim, Partia Lëvizja e Legalitetit i bën thirrje Policisë së Shtetit të veprojë në përputhje me ligjin dhe misionin e saj, duke theksuar se policia duhet t’u shërbejë qytetarëve dhe jo të përdoret si instrument dhune apo presioni politik. Sipas PLL-së, shteti i së drejtës ndërtohet mbi drejtësinë, përgjegjësinë dhe respektimin e lirive dhe të drejtave themelore të çdo qytetari.
