Eshtë rikthyer sërish faqja e peticionit që kërkon largimin e kryeministrit Edi Rama, duke mbledhur një numër të madh nënshkrimesh brenda një kohe të shkurtër.
Sipas të dhënave më të fundit të publikuara nga platforma ku po qarkullon peticioni, ka thyer çdo pritshmëri, duke kaluar shifrën rekord prej 1.7 milione nënshkrimesh.
Në faqen zyrtare të peticionit shfaqet qartë se numri i firmave ka tejkaluar objektivin fillestar prej 1,000,001 nënshkrimesh, duke u mbyllur tashmë në 100% të arritjes së synimit, ndërsa vazhdon të rritet më tej.
Pak para këtij fluksi të madh vizitash dhe nënshkrimesh, faqja e peticionit ka qenë për një periudhë të shkurtër jashtë shërbimit, duke u bërë përkohësisht e paarritshme për përdoruesit.
Në mesazhin shoqërues të peticionit u bëhet thirrje qytetarëve që të shprehin qëndrimin e tyre, duke theksuar se “ndryshimi është i nevojshëm” dhe se çdo firmë përfaqëson vullnetin për të ardhmen e vendit.
Kjo nismë vjen në një klimë të tensionuar politike dhe pas protestave të zhvilluara në Tiranë dhe disa qytete të tjera të vendit, ku pjesëmarrësit kanë kërkuar ndryshime në qeverisje dhe dorëheqjen e kryeministrit.
Peticioni vijon të shpërndahet me shpejtësi në rrjet, ndërsa numri i firmave raportohet në rritje nga ora në orë.
