Ish-deputeti Eduart Ndocaj ka reaguar ashpër për situatën në Rrugën e Kombit, duke ngritur akuza të rënda ndaj institucioneve shtetërore dhe konçensionarit, Shefqet Kastrati.
Në një postim në rrjetet sociale, Ndocaj shkruan se në këtë aks rrugor po ndodhin aksidente të shumta, duke e cilësuar atë si “rrugë vdekjeje”. Ai pretendon se mungesa e sigurisë rrugore dhe neglizhenca institucionale kanë sjellë pasoja të rënda, përfshirë aksidente ku janë përfshirë deri në 10 automjete dhe përmbysjen e një autobusi.
Sipas tij, fondet publike janë keqpërdorur, ndërsa shërbimet bazë për sigurinë rrugore, si hedhja e kripës gjatë kushteve të vështira atmosferike, janë lënë pas dore. Në reagimin e tij, Ndocaj kërkon që çështja të hetohet nga SPAK, duke e cilësuar situatën si “vrasje me qëllim” për shkak të pasojave të rënda për jetën e qytetarëve.
Postimi shoqërohet edhe me një foto simbolike, ku ironizohet situata e mirëmbajtjes së rrugëve gjatë dimrit.
Deri më tani, nuk ka një reagim zyrtar nga institucionet e përmendura lidhur me këto akuza.
