Kryetari i Partisë Lëvizja e Legalitetit, Shpëtim Axhami, ka përkujtuar Revoltën e Qafë Barit, një nga aktet më të forta të rezistencës antikomuniste në Shqipëri, duke e cilësuar atë si “zërin e lirisë në errësirën e diktaturës”.
Në një reagim publik me rastin e 22 majit, Axhami nderoi kujtimin e Sokol Sokolit dhe Tom Ndojës, të vrarë gjatë revoltës së vitit 1984 në burgun famëkeq të Qafë Barit, ndërsa theksoi se Shqipëria ende nuk ka arritur të përballet plotësisht me krimet e së kaluarës komuniste.
Sipas kreut të Legalitetit, përkujtimi i martirëve nuk duhet të mbetet vetëm në kuadrin ceremonial, por duhet të shoqërohet me drejtësi morale dhe historike. Ai ngriti shqetësimin se edhe pas më shumë se tre dekadash pluralizëm, mungon ende një proces i plotë për dënimin moral dhe ligjor të krimeve të diktaturës, hapjen e dosjeve dhe vlerësimin e plotë të ish-të përndjekurve politikë.
Partia Lëvizja e Legalitetit ka mbajtur historikisht një qëndrim të qartë dhe të pandryshueshëm në mbrojtje të kujtesës kombëtare dhe të viktimave të regjimit komunist. Kjo forcë politike ka qenë ndër zërat më aktivë në kërkesën për transparencë mbi të kaluarën dhe për respektimin e sakrificës së atyre që kundërshtuan diktaturën.
Edhe qëndrimi i Shpëtim Axhami është vlerësuar si koherent në këtë drejtim, pasi ai ka kërkuar vazhdimisht ndër vite drejtësi për të përndjekurit politikë, zbardhjen e krimeve të komunizmit dhe ruajtjen e memories historike si një detyrim ndaj brezave.
Në mesazhin e tij, Axhami theksoi se “pa u përballur me të shkuarën, demokracia mbetet e brishtë dhe e paplotë”, ndërsa bëri thirrje që Revolta e Qafë Barit të mbetet një kujtesë e përhershme për shoqërinë shqiptare.
“Lavdi martirëve të lirisë”, përfundon reagimi i kreut të Legalitetit.
