Sot ka nisur zyrtarisht viti akademik i ri në të gjitha institucionet e arsimit të lartë në Shqipëri.
Ndërkohë, vijon raundi i dytë i regjistrimeve në universitete, i cili ka nisur më 29 shtator dhe do të zgjasë deri më 8 tetor, në 5 faza 48-orëshe.
Kuotat në degët e mjekësisë, stomatologjisë, farmacisë dhe arkitekturës tek Universiteti Politeknik i Tiranës janë plotësuar 100%, gjithashtu dhe degët e IT-së. Kuotat janë plotësuar edhe tek dy Akademitë e Ministrisë së Mbrojtjes dhe Rendit. Regjistrimet në universitetet publike janë 75%, ndërsa te privati 25%.
Raundi i tretë i regjistrimeve do të zhvillohet nga data 13 deri më 24 tetor 2025.
Nga afërsisht 20,200 maturantë në të gjithë vendin, mbi 60% kanë zgjedhur të ndjekin studimet në Universitetin e Tiranës, duke e bërë atë institucionin më të preferuar. Në krahasim me vitin e kaluar janë 160 studentë më shumë që kanë preferuar këtë universitet.
Programet më të kërkuara këtë vit janë ato në drejtësi, ekonomi dhe shkenca sociale. Interes i lartë është vërejtur edhe në shkencat e natyrës dhe teknologjinë e informacionit. Ndërkohë, interes më i ulët është shënuar në programet e mësuesisë. Është rritur ndjeshëm edhe numri i regjistrimeve në programet profesionale dyvjeçare.
Viti akademik pritet të përmbyllet më 25 shtator 2026.
Një risi këtë vit janë disa programe të reja studimi që ofrojnë diploma të dyfishta, në bashkëpunim me universitete ndërkombëtare.
Kryeministri Edi Rama ka publikuar foto nga godinat e reja në Qytet Studenti, ku do të akomodohen rreth 5 mijë studentë të Universitetit të Tiranës.
Rama thotë se këto godina kanë shtuar kapacitetin me rreth 700 vende më shumë se një vit më parë.
