Këtë shtator vendosim në plan të parë marrëdhënien prind-fëmijë!
Të dashur prindër, kaloni më shumë kohë me fëmijët tuaj.
Këtë shtator reflektoni sepse koha me ta nuk blihet me para. Fokusohuni të rrisni breza të denjë, qytetarë, humanë dhe profesionistë. Ndiqini ëndrrat e fëmijëve, lejojini të eksplorojnë, eksperimentojnë derisa të gjejnë veten. Do luteni t’i keni në gjirin tuaj më vonë dhe do të jetë vonë.
Mos u bëni egoistë, krijoni një ambjent të ngrohtë familjar, që fëmijët ta besojnë dhe ta jetojnë ‘familjen e shenjtë’. Jepuni dashuri, kuptojeni rrebelizmin e tyre, komunikoni me ta, bëjini shokë dhe mbi të gjitha bëjini të besojnë se ata janë më të mirët e botës.
Mos i krahasoni fëmijët tuaj me fëmijët e tjerë por bëjini ata të besojnë se janë më të mirët, që mund t’ja dalin, që duhet të provojnë dhe të mos dorëzohen.
Mësojuni fëmijëve tuaj që nuk ka dështime por vetëm mësime.
Mos shfryni, gjejeni kohën dhe riktheni në ‘trend’ gjërat e thjeshta të cilat lënë gjurmë.
Lërini anash pajisjet teknologjike, rrjetet sociale. Një shëtitje në park, leximi para gjumit, të parit një film së bashku, të gatuarit një vakt a ëmbëlsirë të preferuar, të qeshurit, sjellin më shumë dobi se like-t dhe televizori.
Bëhuni të butë, të ndjeshëm, të qetë dhe mos lejoni që streset e përditshme t’iu mposhtin se pa ditur, pa dashje e reflektoni te fëmijët tuaj.
Ata ecin në gjurmët tuaja, ata bëhen ajo çka shohin çdo ditë te ju, në shtëpinë tuaj, në komunikimin tuaj me të tjerët, në mënyrën se si ju trajtoni më të dobëtin.
Vishini’ fëmijës përgjegjësi, jepini detyra (sigurisht të drejta për moshën dhe kapacitetin e tyre), kërkojuni mendime, lërini të shprehen, bëjini të ndihen të rëndësishëm por mbi të gjitha të dashur.
Bota po humb sensin, bëhuni ju sensi dhe kuptimi i botës.
Edukoni breza pa trauma, breza të lirë, me qëllime, me mundësi të reja, me horizont largpamës dhe mbi të gjitha breza që gjithçka e bëjnë me gjuhën e dashurisë.
Të nderuar prindër, ju keni në dorë të ardhmen, mos lejoni që ajo të jetë robotike, pa emocion, e zhytur mes kaosit dhe bullizimit.
Mos rrisni fëmijë të etur për pushtet e para por rrisni fëmijë të etur për dije dhe dashuri! (E. D/infopressalbania)
