Vllaznia zhvilloi dy ndeshje të enjten në Limasol të Qipros. Nëse ndaj skuadrës AEL të këtij qyteti humbi 1-0 ndeshjen e vajtjes, pas golit Scepoviç (45’+2), për turin e dytë të “UEFA Conference League”, skuadra e Vllaznisë ‘fitoi ndeshjen e dytë’, atë të shëndetit dhe të sakrificës së futbollistëve.
Me ndihmën e stafit mjekësor Zyhdi Çoba dhe Ilirjan Haxhaja, futbollistët arritën të mposhtnin virozën e stinës, siç e quajtën mjekët, që kaploi thuajse të gjithë delegacionin shkodran, duke vënë në rrezik edhe zhvillimin e takimit në orën 19:00 ndaj AEL.
Jonuzit iu bë serum në dhomat e hotelit, Hoxhajt po ashtu, ndërkohë që për Latifin ishte e nevojshme të bënte një serum në spitalin e qytetit dhe të paguheshin 280 euro për këtë shërbim. Kalaja volli para se të nisej ekipin për në stadium, gjë do të bënte edhe Adili para fillimit të ndeshjes dhe Krymi pas saj. Për pamundësi fizike, Ardit Hoxhaj nuk erdhi fare ne stadium por qëndroi në hotel, në pamundësi për të lëvizur.