Nga Elona Caslli
Z. Kryebashkiak
Duke qenë se e ndjek me kërshëri faqen tuaj zyrtare për t’u informuar mbi dobitë që ju i sillni sistematikisht qytetit tim, doja të ndaja me ju, një çështje që e kam fort të turbullt. Ju si njeri zemërgjerë që jeni do t’i kushtoni një grimcë vëmendjeje një qytetareje që është e shqetësuar për qytetin e saj.
Po citoj postimin tuaj të fundit për të cilin më mungon kthjellia.
Ju shkruani:
Nona fare Eqrem-sat tani!
Shkolla “Eqrem Çabej”, një nga rehabilitimet më të freskëta të bashkisë, e sapo bërë gati për vitin e ri akademik.
Ka lezet tani shkolla! Çantat e librat dhe direkt për mësim!
Erion Veliaj...
Ka dy elemente brenda fjalisë suaj që përfaqësojnë dy institucione krejt të ndryshme:
Shkolla “ Eqerem Çabej” – elementi i parë; Gati për vitin e ri akademik- elementi i dytë
Lind pyetja:
Shkolla “ Eqerem Çabej” është një shkollë e mesme apo është një shkollë e lartë?!
Një shkollë e mesme nuk mund të bëhet gati për një vit akademik. Një shkollë e mesme mund të bëhet gati për një vit shkollor.
Lexoni me vëmendje urtinë e shkencës:
Shkollor- Që i përket shkollës (kryesisht tetëvjeçare e të mesme); që ka të bëjë me shkollën dhe procesin mësimor; që është bërë për shkollën dhe për procesin mësimor.
Shembull- Vit shkollor; Uniforma shkollore
Akademik -Që ka të bëjë me jetën e me veprimtarinë e shkollave të larta, mësimor (për shkollat e larta).
Shembull; Vit akademik; orë akademike
Post Scriptum- Nuk po ndalem tek regjistri gjuhësor që keni përdorur për të përcjellë lajmin tek qytetarët, pasi mjafton vetëm hyrja në krye të mesazhit- Nona fare Eqrem-sat tani! -për të kuptuar qartë prejardhjen dhe përbërjen tuaj.
Krijoni një marrëdhënie me fjalorin e gjuhës shqipe Z. Kryebashkiak. Kjo marrëdhënie do t’ju nxirrte nga errësira në dritë. Më besoni.
Sinqerisht
Elona Caslli
