Nga Dr. Sonila Tanku-Daiu
Në vitet e gjata të opozitës kam zgjedhur që fatin tim politik ta ndaj me qytetarët dhe demokratët e Elbasanit. E kam ndjerë si detyrim që më shumë se me këdo, mirënjohjen dhe vlerësimin ta ndaj me njërëzit që kanë sakrifikuar gjithçka për logon dhe lidershipin e Partisë Demokratike!
Komunikoj dhe takoj çdo ditë dhjetra gra dhe vajza, burra dhe djem të cilët dëshpërimisht flasin për situatën në të cilën ndodhet vendi. Sot ka shumë pak për të folur, pasi e gjithë situata është bërë toksike, e trishtë dhe e pashpresë.
Por sot të gjithë bien dakord se situata është e tillë. Me përjashtim të atyre që fatin e kanë lidhur mbi bazë interesash me pushtetin, apo më keq akoma atyre që qorrazi zgjedhin dhe votojnë pa logjikë e përgjegjësi qytetarët, gjithë të tjerët po jetojnë ditët më të vështira nën një sistem jodemokratik të drejtuar nga Edi Rama.
Në gati një dekadë kemi thënë dhe bërë gjithçka për tiu qasur interesit qytetar dhe për të treguar se sa keq po qeveriset ky vend. Por makinacionet politike dhe paratë e shpërndara në mesnatën e ditëve zgjedhore fatkeqsisht kanë blerë edhe dinjitetin edhe varfërinë e qytetarëve të pashpresë.
Sot askush nuk i ka sytë dhe mendjen tek sjellja e qeverisë. Të gjithë e kanë kushtëzuar të vetmen shpresë për të qëndruar dhe jetuar në këtë vend me alternativën opozitare.
Jo në pak raste kemi paguar fatura të rënda për shkak të lidershipit apo zgjedhjeve të gabuara në hierarkinë e familjes tonë politike. Koha ka qenë treguesi i gjithçkaje ndaj edhe fjalët për këtë dobësi tonën janë të tepërta.
Ajo që ka më shumë vlerë sot është të ndërtojmë një komunikim të vërtetë me ata që janë më besnikët dhe e kanë mbajtur Partinë Demokratike në nivele të larta edhe kur besimin dhe sigurinë nuk e kanë pasur të plotë.
Sot duhet të jemi të vërtetë me demokratët të parët! Sot duhet të mësojmë duke i dëgjuar ata. Sot duhet t’i japim atyre një alterntivë që të jetë e sinqertë dhe që mjekon plagët e marra vazhdimisht në këtë dekadë.
Vetëm duke qenë të vërtetë do të jemi fitues! Unë besoj se i kemi të gjitha mundësitë për të qenë të tillë!
