Nga Marsela LEKLI, psikologe
“Dhuna ndaj grave është ndër shkeljet më të turpshme të të drejtave njerëzore”, do të shprehej Kofi Annan,
Ky nënvizim i ish Sekretarit të Përgjithshëm të OKB, m’u kujtua teksa dëgjoja rastin horror të ditës së sotme, ku burri hedh nga ballkoni gruan e tij.
Janë të shumtë artikujt rreth dhunës ndaj grave dhe vajzave që po kthehen në kryelajm në Shqipëri. Ky fenomen, tashmë është panorama e qartë e një shoqërie që është zhytur në spiralen e bjerrjes së vlerave morale dhe shpirtërore të saj, dha nga ku ngjizet dhunshëm egoja maskiliste, e cila ushqehet me indikatorët social-ekonomikë dhe prodhon këtë situatë alarmante, ku statistikat dëshmojnë provincialitetin dhe primitivitetin e qasjes sonë ndaj qytetërimit.
Të gjithë e njohim dhe të gjithë e pohojmë njëzëri se dhuna ndaj grave është një nga fenomenet me të rënda, me cilin përballet sot shoqëria shqiptare. Ajo është e përhapur kudo, si nga pikëpamja fizike, ashtu dhe nga ajo psikologjike, por përballë rasteve që shtohen dita-ditës, natyrshëm lind nevoja e hartimit të një strategjie komëbëtare, me prioritet absolut parandalimin e dhunës në familje.
Shoqëria ka nevojë t’i adresojë dukuritë, që kërcënojnë mbarëvajtjen e saj dhe mirëqenien e qytetarit. Përpjekjet duhet të përqendrohen në veçanti në krijimin e një ambienti, në të cilën fëmijët tanë rriten me kujdes, dashuri, dhe qasje në shkollim në frymën e edukatës, të lirë nga dhuna dhe stereotipet gjinore. Një qasje e tillë afatgjatë do të sigurojë zbatimin dhe respektimin e të drejtave të njeriut dhe vlerave të tjera që ne i ndajmë me civilizimin evropian.
Një faktor shumë i rëndësishëm në parandalimin e dhunës në familje, është komuniteti, dita-ditës i ndërgjegjësuar tashmë për impaktin negativ dhe pasojat që sjell ky fenomen. Të gjithë anëtarët e komunitetit, përfshirë këtu individët, organizatat dhe institucionet e ndryshme, politikë bërësit dhe sistemi ligjor duhet të jenë të bashkuar në përpjekjet e tyre për të siguruar dhënien fund çdo dhune me bazë gjinore, duke përfshirë dhunën dhe abuzimin ndaj grave dhe fëmijëve.
Prandaj, së bashku, le të angazhohemi dhe të vlerësojmë potencialisht këtë sfidë të madhe të shoqërisë sonë. Dhuna në familje shkatërron jetët, trondit trungun e familjes së shëndoshë, përçan komunitetin dhe pengon zhvillimin dhe prosperitetin e shoqërisë, ndaj dhe apeli im, shkon për të gjithë institucionet ligjzbatuese që të veprojnë me rreptësinë më të madhe ndaj të gjithëve atyre që guxojnë të ngrenë dorë mbi femrën.
