Analisti Artur Zheji komentoi me ironi ultimatumin e kryeministrit Edi Rama ndaj drejtorëve dhe ministrave të tij për të mos abuzuar me fondet. Zheji u shpreh në emisionin Breaking në Top News, se atyre që jetojnë në luks, Rama u thotë “kujdes me lekët e popullit”.
Zheji foli edhe për situatën në PD, ku theksoi se Lulzim Basha nuk do ta largontë kurrë Sali Berishën, nëse nuk do përballej me presionin amerikan.
Çdo luftë brenda PS, analisti e quan të humbur, pasi sipas tij, Rama është shumë i fortë dhe ka mbështetjen e SHBA-vë.
“Rama u thotë drejtorëve dhe drejtoreshave milionere, kini kujdes se mos ju kap. Ata jetojnë në luks, ndërsa Rama u thotë ki kujdes me lekët e popullit. PD nga ana tjetër po ha vetveten. Kur Edi Rama mohoi Fatos Nanon, ky i fundit nuk ishte shpallur “non grata” nga SHBA, thjesht kishte humbur zgjedhjet. Rama ishte një kalë race i mirë për të drejtuar PS-në.
U bë një shkëmbim i dhimbshëm, por i butë. Nga ana tjetër, Basha nuk do ta mohonte kurrë Sali Berishën, nëse nuk do i jepej një kusht i madh, që PD të hante bar, që të gjithë në PD të shpalleshin “non grata”.
Fakti që për momentin nuk ka opozitë, kjo krijon polarizime brenda në PS. Por fuqia e Edi Ramës është e madhe. Kupola amerikane i ka dhënë shumë akses Edi Rama. Ai tako dje George Soros dhe Henry Kissinger. Kjo tregon se ai ka mbështetje”, tha Zheji.
Analisti foli edhe për “qetësimin” e presidentit Ilir Meta, të cilin e quajti inkoherent në qëndrimet e tij.
“Nuk e prisja qetësimin e presidentit. I dola fjalë Ramës. Meta tani po sillet si president dhe kjo është gjë e mirë. Por gazetarët dhe qytetarët kanë kujtesë.
Nuk mund të bësh paralajmërime dhe pastaj të mos jesh inkoherënt në qendrimet e tua. Kjo lexohet si dobësi. Lajmi i mirë është se presidenti po bëhet gjithnjë e më presidencial”, tha Artur Zheji.
Zheji komentoi edhe disa raportime, se Rama synon të bëhet sekretar i Përgjithshëm i NATO-s.
“Pse të mos e bëjë. Në një ndeshje kombëtare, mes PS-PD-LSI, nëse do luanin në një skuadër tjetër, ti do jesh me kombëtaren. Nëse kupola e madhe vendos se një shqiptar do zgjidhjet sekretar i përgjithshëm, pse jo.
Por nuk e ha atë Rama. Nuk ikën nga Shqipëria ai. Këtu i ka rrënjët. Nuk do që ti thahen rrënjët, ku i ka ngulur fort”, tha Artur Zheji.
