Novelistja dhe publicistja turko-britanike, Elif Shafak ka publikuar në rrjete sociale, fjalët rrëqethëse të Zarifa Ghafari, kryebashkiakes së parë grua në Afganistan, tashmë që i gjithë shteti është sërish në duar të talebanëve.
“Jam ulur dhe po pres që ata të vijnë. Nuk ka asnjë që të më ndihmojë mua apo familjen time. Ata do të vijnë për njerëz si unë, të më vrasin”, janë fjalët tmerruese të 27 vjeçares, Zarifa Ghafari.
“Fjalë rrëqethëse nga e guximshmja Zarifa Ghafari, kryebashkiakja e parë grua. Gjithçka duket e parëndësishme krahasuar me britmat e grave afgane”, shkruan në rrjetet sociale, novelistja Elif Shafak.
Talebanët kanë marrë Kabulin dhe popullata, sidomos bashkëpunëtorët e SHBA-ve dhe komunitetit ndërkombëtar, frikësohen nga hakmarrja. Ata po përpiqen të largohen masivisht dhe janë dyndur drejt aeroportit të Kabulit.
Ditën e sotme ka patur raportime dhe dëshmi filmike, se si të paktën dy persona janë rrëzuar nga krahët e një avioni amerikan, ndërkohë që avioni ishte në lëvizje.
Në Afganistan mbizotëron frika dhe paniku, veçanërisht tek gratë, që janë kategoria më e rrezikuar, e shtypur dhe diskriminuar nën regjimin e talibanëve. Ato nuk mund të shkollohen pas moshës tetë vjeçare, duhet të qëndrojnë kryesisht në shtëpi dhe nuk mund të lëvizin lirisht pa prezencën e një burri të familjes. Gjatë regjimit të talebanëve deri në vitin 2001, vajzat minorene martoheshin me detyrim dhe nuk kishin të drejtat themelore të njeriut.
Në shtypin ndërkombëtar ka patur raportime, se talebanët kanë nisur të trokasin derë më derë, për të kërkuar personat në listën e tyre të “armiqve”.
