11 ditë pasi humbi jetën gjatë një shkëmbimi zjarri me forcat RENEA, 35-vjeçari grek Kostantinos Katsifas, është përcjllë ditën e sotme për në banesën e fundit.
Në ceremoninë mortore të tij, morën pjesë mijëra grekë, por kishte edhe nga ata që u ndaluan në kufi dhe nuk u lejuan të merrnin pjesë.
Burime nga policia, bëjnë me dije se nuk janë lejuar të futen 46 persona mes të cilëve ishin 44 huliganë, ndërsa janë proceduar për tubim të paligjshëm 2 persona.
Deri më tani nuk ka asnjë të arrestuar, ndërsa mes të proceduarve mësohet se është edhe një polic grek nga burgu i Janinës, i cili ishte në Bularat.
Të ndaluarit mbanin me vete bluza, pankarta dhe flamuj të ndryshëm, si të Vorio-Epirit, simbole naziste e shprehje me urrejtje.
Kujtojmë se, gjatë ceremonisë së zhvilluar, familjarë të 35-vjeçari si dhe personazhe të tjera kanë mbajtë disa fjalime, të cilët e kanë quajtur Katsifan si të pavdekshëm. Pas varrimit të 35-vjeçarit, turma e njerëzve është larguar nga Bularati në drejtim të vendeve nga ku kanë ardhur.
“Zjarr qenve shqiptar”, “Gjaku na thërret të djegim shqiptarët”, “Duhet të dini se këto janë tokat tona, jemi në Vorio-Epir këtu”, “Greqi, Greqi ti na drejton ne”, kanë qenë disa nga thirrjet më të rënda kundër shqiptarëve.
Por nuk kanë munguar thirrjet edhe ndaj gazetarëve shqiptarë. “Gazetarë të poshtër”, është dëgjuar të thërrasë turma.
Ndërkohë siç shihet dhe nga pamjet e siguruara nga ‘Fax News’ arkëmortit i prinë ektremisti grek i ‘Agimit të Artë’, Babis Karathanos.
