Bilanci i viktimave nga koronavirusi në Itali është edhe më i lartë sesa ai zyrtar nëse do të merreshin parasysh personat që ndërrojnë jetë në banesat e tyre. Për disa qytetarë, kjo është zgjedhje, por edhe nuk ka alternativë nga mbingarkimi i sistemit shëndetësor.
Nga intervistat me familjet, doktorët dhe infermierët në rajonin më të prekur të Italisë, në Lombardi, mësohet se janë të shumta viktimat e koronavirusit që kanë ndërruar jetë në ambientet e shtëpisë.
Vetëm në provincën e Bergamos, ku raportohen mbi 2 mijë të vdekur nga pandemia, një studim i javës së kaluar zbuloi se bilanci real mund të jetë dyfishi, pasi aty përfshihen vetëm rastet në spitale.
Rikardo Munda, që po kryen punën e dy doktorëve në këtë zonë pasi kolegu i tij është infektuar, thotë se konsultat me telefon nuk duken aq efikase.
“Shumica e pacientëve të moshuar duhet të ekzaminohen në shtëpi përndryshe nuk i shpëton dot pasi ata mund të vuajnë nga demenca apo sëmundja e moshës dhe nuk i raportojnë dot simptomat që po përjetojnë.”
Sipas doktor Mundës, nëse njerëzve do u sigurohej shërbim i shpejtë mjekësor do evitohej numri i lartë i vdekjeve në vend, por doktorët e familjes janë të tejngarkuar, nuk kanë mjaftueshëm maska dhe veshje mbrojtëse dhe u kanë kërkuar qytetarët të mos lëvizin për vizita po nuk e patën të nevojshme.
Tani shumë pacientë nuk përfundojnë më në spitale por përkujdesen vetë në shtëpi me ilaçet dhe aparatet ekzistuese kur kanë probleme me frymëmarrjen.
“Shumë familje që e kanë përjetuar një herë humbjen në spital të një anëtari të familjes nuk duan që të ndodhen më larg të dashurve në ditët e tyre të fundit, ndaj preferojnë t’i mbajnë ata në shtëpi për këtë moment të dhimbshëm. Po jetojmë në një luftë reale, një luftë së cilës tani nuk ia shohim dot fundin,” shprehet infermierja Maura Zukeli.
Ajo thotë se eikipi i saj në zonën e Bergamos detyrohet të kalojë orë të vështira e emocionuese në shtëpitë ku ka të prekur me Covid-19.
Italia është vendi i tretë në botë me më shumë raste koronavirusi, me gati 130 mijë të infektuar dhe rreth 16 mijë viktima në mbarë vendin.
