Umberto Giunti një piktor italian, i cili ishte i pasionuar ndaj artit të Rilindjes, gjithë jetën e tij e përqëndroi në restaurimin dhe kopjimin e disa prej afreskeve dhe tablove të asaj periudhe.
Nga pikturimet mjeshtërore, thuajse të padallueshme nga origjinalet, janë befasuar shpesh specialistët e muzeve më të njohura të botës, gjatë krahasimeve midis krijimeve të reja të Giunti-t me tablotë e Rilindjes.
Studiuesit G. Mazzoni e D. Rossi i kanë kushtuar një libër të veçantë artit të tij (Umberto Giunti. Pittore di quadri antichi, Roma, 1999).
Pikërisht në kohën kur fama e pikturimit të Giunti-t, e kishte kapërcyer Italinë, Gjergj Fishta u takua me piktorin në Siena. Pasioni i poetit, studiuesit dhe klerikut të njohur shqiptar për Artet e Bukura ndikoi në miqësinë e menjëhershme midis tyre.
Edhe Fishta ishte bërë i njohur në ato vite për vizatimet e tij, për organizimin e Ekspozitës së parë të krijuesve shkodranë (1920), si dhe për veprimtari të tjera artistike. Gjatë kohës së qëndrimit në Siena, Giunti pikturoi portretin e Fishtës në ngjyra vaji.
E ruajti deri vonë nga Pader Daniel Gjecaj, tabloja është sjellë në Shkodër pas vitit 1990 dhe tani është vendosur në sallën e Bibliotekës Françeskane.
