Kur kanë mbetur edhe dy ditë nga mbajtja e seancës konstituive të Kuvendi të Kosovës, subjektet fituese të zgjedhjeve të 6 tetorit Lëvizja Vetëvendosje dhe Lidhja Demokratike kanë përafruar qëndrimet rreth formimit të institucioneve të reja.
Çështja e postit të presidentit të shtyhet për më vonë, raporton SYRI.net Kosova.
Lëvizja Vetëvendosje ka konfirmuar se marrëveshja është përfunduar ndërmjet tyre dhe Lidhjes Demokratike të Kosovës.
Kjo marrëveshje do të firmoset së shpejti.
‘Është e rëndësishme se ka lëvizje pozitive me idenë që çështja e postit të presidentit të shtyhet për më vonë’, thanë zyrtarë nga Lëvizja Vetëvendosje.
Nënkryetari i LDK-së, Lutfi Haziri, tha se deri në mesditë nuk pritet të ketë takim ndërmjet kryetarit të LDK-së, Isa Mustafa, dhe atij të LVV-së, Albin Kurti.
Ai tha se nuk ka ngecje e vonesa për arritjen e ndonjë marrëveshje dhe e cila do të arrihet para seancës konstituive.
