Partia Lëvizja e Legalitetit ka reaguar ashpër ndaj projektligjit “Për kalimin në pronësi të tokës bujqësore, shtetërore apo private, tek personat fizikë dhe juridikë të huaj”, duke e cilësuar të papranueshëm në kushtet kur mijëra familje shqiptare ende presin zgjidhjen e çështjes së pronave.
Kreu i PLL-së, Shpëtim Axhami, kërkon që çdo pronë e lirë shtetërore të përdoret për kompensimin fizik të pronarëve të dëmtuar nga regjimi komunist dhe jo për t’u kaluar subjekteve të huaja.
Në deklaratën e tij të plotë, Axhami shprehet:
“Çdo pronë e lirë shtetërore të ju jepet pronarëve për kompesim!
Partia Lëvizja e Legalitetit shpreh shqetësimin e saj të thellë lidhur me projektligjin ‘Për kalimin në pronësi të tokës bujqësore, shtetërore apo private, tek personat fizikë dhe juridikë të huaj’.
Ne mbrojmë pa ekuivok të drejtën e pronës dhe interesin kombëtar. Shqipëria vazhdon të ketë mijëra qytetarë e familje pronare që prej dekadash presin zgjidhjen e çështjes së pronave të grabitura nga regjimi komunist.
Në këto kushte, është e papranueshme që shteti të diskutojë kalimin e tokës bujqësore në pronësi të subjekteve të huaja, ndërkohë që ende nuk ka përmbushur detyrimet ndaj pronarëve shqiptarë të lënë pa pronat e tyre.
Partia Lëvizja e Legalitetit thekson se këto prona të lira shtetërore që ekzistojnë, toka dhe sipërfaqe të pashfrytëzuara, duhet të përdoren për kompensimin fizik të pronarëve që ju është grabitur prona e tyre dhe këto të fundit stimulohen me politika shtetërore për zhvillimin e tyre.
Ky do të ishte një akt drejtësie historike dhe një hap konkret për rivendosjen e besimit te shteti i së drejtës mbi pronën duke zbutur sado pak kaosin e shkaktuar nga ligji 7501.
Toka shqiptare nuk mund të trajtohet si mall spekulimi duke lënë hapësira edhe për abuzime të tjera antikushtetuese, ndërkohë që pronarët e ligjshëm vazhdojnë të mbeten pa të drejtën e tyre mbi pronën.”
