E ftuar ditën e sotme në ‘Kafe Shqeto’, për të diskutuar mbi sfidat dhe problematikat e sistemit të drejtësisë në Shqipëri, avokatja Kalaja theksoi se reforma në drejtësi dhe ndikimi i medias kanë pasur një rol kyç në përshpejtimin e zhvillimeve dhe në ndryshimet që po ndodhin në këtë sistem.
Ajo shprehu shqetësimin se ndërhyrjet e jashtme, si mediat dhe politikat e momentit, shpesh-herë janë bërë faktore që kanë deformuar dhe minuar besueshmërinë e qytetarëve në drejtësinë shqiptare.
Në një analizë të hollësishme, Kalaja theksoi se, përveç sistemit të drejtësisë, një problem i madh është ndikimi i medias, e cila shpesh financohet nga buxheti shtetëror.
Ajo e cilësoi këtë një formë tjetër të “regjisë” së drejtësisë, ku informacionet dhe hetimet, në vend që të ishin të drejta dhe objektive, shpesh shërbejnë për të krijuar opinione të paracaktuara për individë të caktuar, për të shpërndarë lajme që mund të ndikojnë në proceset gjyqësore dhe hetimore.
Adriana Kalaja: “Më e rëndësishmja në të gjithë këtë histori është përmbajtja e përgjigjeve për të treguar se çfarë është bërë me opinionin publik, jo vetëm nga drejtësia, por edhe nga media, e cila në pjesën më të madhe paguhet nga taksat e qytetarëve. Të gjitha këto na çojnë aty ku ne e kemi ngritur shpeshherë shqetësimin: drejtësia me regji.
Për të bërë një diskutim, pasi nuk e quaj replika, ka një procedurë që me ligjin e vjetër, që gjoja ne e kishim të keqen, prokurori apo gjyqtari mund të niste një procedim penal. Ligji e kishte detyrë, sepse, siç e ngrite si pyetje, detyra për ta hetuar këtë ishte e prokurorit apo gjyqtarit të Tiranës, i cili bënte pjesë në Durrës.
Ndërkohë, çfarë ndodhi me reformën në drejtësi? Me ndryshimet ligjore të vitit 2016, kompetenca për të hetuar të gjitha këto vepra penale i kaloi SPAK-ut. Tani SPAK do të hetojë SPAK-un, dhe do të jemi në atë skandalin tjetër që ky institucion vuri në përgjim anëtarin e Gjykatës Kushtetuese.
Pra, ka një problem shumë të rëndësishëm ligjor dhe i dyti, kush do ta hetojë SPAK-un? Tani, pa u marrë ende përfundimisht me interpretimin e asaj që ka ndodhur, unë mendoj se ajo që neve, për një periudhë aq të gjatë kohe, na vihet në dispozicion nga mediat të paguara dhe jo vetëm, unë nuk i shoh si hakerime, por i shikoj si një tentativë të vetë prokurorëve të pasak, dhe këtu mbaj edhe përgjegjësinë ligjore, për prishjen e dosjeve.
Pse e them këtë? Nëse manit mend dosjen 184 që unë guxova dhe e dërgova sërish në SPAK dhe ata sërish nuk e morën në konsideratë, nëse ata e kanë realisht në fokus luftën ndaj krimit zgjedhor, ajo dosje u prish në momentin që u publikuan përgjimet, pra doli në publik.
Ndërkohë, po bëhet e njëjta gjë me disa dosje të rëndësishme për të shmangur arrestimin e individëve të caktuar, që sa do ta shtyjnë, nuk e shmangin dot”.
